amalinks wokungena

Breaking News

Izihambi Emgwaqweni Oya Kwele Botswana Zikhala Ngobunengi Bama Road Blocks


Uzulu ukhala ngama road blocks emangweni weBotswana kusiya kwele Zimbabwe.

Izihambi phakathi kweZimbabwe leBotswana zikhala ngokuthi akula nguquko ngodaba lwemigoqo emigwaqweni eyama road blocks ngemva kokuba uhulumende ebike ukuba inani lawo selizakwehla ngenyanga edluleyo.

Umbiko kahulumende wenyanga edluleyo wokuthi imigoqo yasemigwaqeni eyama road blocks izakwehliswa, wamukelwa linengi kodwa izihambi zithi lokhe kufana nje kwezinye indawo sokungathi sokwengeziwe.

Uhlangothi olubona ngokungena kwezethekeli elizweni olweZimbabwe Tourism Authority luthi izihambi ezinengi zikhonona ngemigoqo yama road blocks eminengi nengi le.

Ngokunjalo umphathintambo obona ngokungena kwezethekeli, umnunzana Walter Mzembi waxoxisana labanye bakhe kuhulumende ukuthi kwesulwe imigoqo yama road blocks.

Noma nje ngenyanga edluleyo umphathintambo obona ngendaba ezenzakala phakathi kwelizwe, umnunzana Ignatius Chombo etshele idale lephalamende ukuthi imigoqo le izakwehliswa ibe mine kuphela ngasigaba.

Kodwa umnunzana Raymond Moyo, ovame ukuhamba phakathi kweGaborone lakoBulawayo uthi akulantshintsho.

“Kuyadanisa ngoba sasitshelwe ukuthi ama road blocks azakwehliswa kodwa lokhe kufanana, zihamba simiswa indlela yonke.”

UMnu. Stanley Ncube uthi uhulumende kumele akhulume ngelizwi elizwakalayo hatshi ukuthi ama road blocks aluhlobo olutshiyeneyo, ngoba amapholisa elokhe eqhubeka ehlupha izethekeli emgwaqweni.

“Ama road blocks abulala itourism, isandla sonxele asikwazi ukuthi esokudla siyenzani. Nxa sibona amapholisa emgwaqweni thina sibona iroad block. Kuzalimaza inani lezethekeli elingena elizweni.”

Uhulumende uthi imigoqo yama road blocks itshiyene, esithi uhlubo lwama road blocks olwehliswayo yilawo okuyabe kulebhakane elilotshwe ukuthi ‘Police Ahead’ njalo kule migoqo kanye lama dilamu abonakalayo.

Kodwa kuqhubeka kulamanye amapholisa amisa izimota kungela migoqo eyenza iroad block, njalo izihambi zikhala ngokuthi ziyabanjelelwa njalo kumgceke ukuthi inhwawulo efunwa ngamapholisa la, kayiyi esikhwameni sikahulumende kodwa ezawo.

Facebook Forum

XS
SM
MD
LG