amalinks wokungena

Breaking News

Amabandla Aphikisayo Alakho Ukunqoba iZanu PF Kukhetho Lonyaka


UManyano weMDC Alliance okhokhelwa nguMnu. Nelson Chamisa ukhanya ulakho ukuthi ungasusa ibandla leZanu PF embusweni.

Amabandla ezombusazwe aphikisayo abikwa elakho ukukhipha ibandla leZanu PF embusweni nxa indubo ezikhona eZimbabwe, ezigoqela ukuswelakala kwemali, zingaqhubekela phambili.

Okunye okuhlupha uzulu yikuswelakala kwemisebenzi lokunye okubhekwe nguhulumende kaMongameli Emmerson Mnangagwa.

Ingcwethi ezicubungula ezombusazwe zithi lobanje kulamabandla amanengi azancintisa kukhetho olwenziwa lonyaka eZimbabwe, umanyano weMDC Alliance okhokhelelwa nguMnu. Nelson Chamisa lowe People’s Rainbow Coalition okhokhelwa nguNkosikazi Joice Mujuru ulakho ukunqoba ibanald leZANU PF nxa ukhetho lungenziwa indubo lezi ziqhubekela phambili.

UMnu. Elvis Jaleke, eyinye yalezi ngcwethi zombusazwe, uthe uzulu usehlukumezeke okwesikhathi eside phansi kombuso webandla leZanu PF osekunganikeza ithuba elihle amabandla aphikisayo ukuthi anqobe kukhetho oluzayo.

Uphinde wathi ukungena kukaMnu. Nelson Chamisa kukhetho lolu kungenza ukuthi abatsha abanengi babe lamadlabuzane okuvota kukhetho lolu.

Okunye njalo osekuvuselele ithemba lokuthi umbuso weZANU PF usungabe usufika kogoqwa nyawo yikuphindela kowayengumongameli uMnu. Robert Mugabe kwezombusazwe ebambisana lebandla leNational Patritic Front.

UMugabe ukhala ezimathonsi esithi uMnangagwa wamsusa esikhundleni encidiswa libutho ngakho-ke lokhu akwenziwanga ngemfanelo.

UMnu. Nkosana Dlamini, ohlaziya ezombusazwe, uthe ukusekelwa kwamabandla aphikisayo nguMugabe kulakho ukudabula usekelo lweZanu PF, abanye besiya kuMnangagwa abanye belandela uMugabe osekungenza iMDC Alliance ithole ithuba lokunqoba kukhetho.

Kodwa-ke eyinye yengcwethi ehlaziya ezombusazwe, uMnu. Prince Moyo, uphambana labanye esithi lobanje ukudabuka kwebandla leZanu PF kulakho ukwehlisa ubuqili kukhetho ngoba amacele womabili alelibandla esazana indlela ayezisebenzisa ukuqila kukhetho, udubo yikuthi amabandla aphikisayo esemanengi kakhulu.

Ohlaziya ngezenhlalakahle kazulu, uMnu. Sineke Sibanda, yena uthe kuqakathekile ukuthi amabandla aphikisayo azwisise ukuthi acintisana lebandla eliyisimakanjani.

Ezinye ingcwethi zithi lalobanje ibandla leZANU PF lingajabulelwa ngabanengi ukusuka kuka Mugabe kungalenza lamukeleke njengebandla elizimisele ukuletha inguquko elizweni.

Imibiko ethulwe ngumgcinisihlalo wekhomishini ebona ngokuqutshwa kokhetho eye Zimbabwe Electoral Commision (ZEC), uNkosikazi Priscilla Chigumba, ithi amabandla aphikisayo eZimbabwe asefika ikhulu lasikhombisa.

Ingcwethi zithi amanye amabandla la anjengo mlilo wamaphepha.

Facebook Forum

XS
SM
MD
LG