amalinks wokungena

Breaking News

Zimbabwe Rainbow Democratic Party: Kasifuni Ukubambana Lamabandla Aphikisa eleZanu PF


Manengi amabandla asebumbe imanyano ukwenzela ukulwisana lebandla leZanu PF.

Ibandla elisanda kusungulwa elezombusazwe eleZimbabwe Rainbow Democratic Party selisole labo abakumanyano wamabandla aphikisa elibusayo lisithi bakwenza lokhu befuna ukusuthisa izisu zabo hatshi izifiso zikazulu.

Ekhuluma lentathelizindaba yeStudio 7 besanda kwenza umhlangano eHarare ngeSonto, umongemeli webandla leli, uMnu Cuthbert Ncube, uthe kabafuni ukubambana lamanye amabandla ezombusazwe ngoba bayizihwaba eziqakathekisa amandla kulentuthuko yelizwe.

Uthe bafuna ukuthi ilizwe lilungisise indaba yemali, imigwaqo, imisebenzi lokunye okwenza abantu bahlale bethabile kulokuqakathekisa ukusuthisa abantukazana.

Omunye njalo obe esemhlanganweni lo nguMnu Gwinyai Muzorewa yena okhokhelela ibandla leUnited African National Council, othe bona njengebandla bayasekela ukubunjwa kwe ZRDP kodwa kabavumelani lomanyano wamanye amandla.

Omunye njalo okubandla leZRDP, uMnu Donovan Masuku, uthe kabasoze bafanane le ZANU PF eqakathekisa ukukhuluma nje kuphela ingenzi lutho olucacayo.

Ingcwethi kwezombusazwe zithi ukubunjwa kwalelibandla akusoze kuguqule lutho ekulwiseni ekuzameni ukususa ibandla leZANU PF embusweni.

Okwamanje umanyano okhona oweMDC Alliance uphakathi kwenxaki enkulu ngenxa yokugula kuka Mnu. Tsvangirai, abanye besithi uMnu. Chamisa nguye ozathatha izikhundla zakhe kuthi abanye basekela uMnu. Elias Mudzuri.

Udaba Esilethulelwe NguGibson Bhebhe
please wait

No media source currently available

0:00 0:02:07 0:00

Facebook Forum

XS
SM
MD
LG