amalinks wokungena

Breaking News

Zithwele Nzima Izethekeli zeZimbabwe Emngceleni weBotswana


Zinengi izizalwane zeZimbabwe ezethekelela ele Botswana.
Zinengi izizalwane zeZimbabwe ezethekelela ele Botswana.

Izihambi ezingena kweleBotswana zisebenzisa umngcele weRamokgwebana zikhala ngokuthi zima isikhathi eside zifolele ukudindelwa ingwalo ukuba zichaphe umngcwele laloba kwezinye insuku kuyabe kungelabantu abanengi.

Zithi izisebenzi kucele leBotswana azilamusa njalo zilesidensi.

Ukungena eBotswana ngomngcele weRamokgwebana ikakhulu kuzethekeli ezivela eZimbabwe kuhlasimulisa umzimba.

Izethekeli, ngemva kokuthola usizo ngesiphangiphangi kucele leZimbabwe ePlumtree, zizithola sezichaye amalembu ngaphansi kwezihlahla kucele leBotswana eRamokgwebana.

Lokhu ngoba izikhathi ezinengi kutholakala indwendwe lezindwendwe emgnceleni weRamokgwebana, izihambi zikhonona ngokuthi abeBotswana balesidensi bebanceda engathi kabafuni.

Unkosazana Ireen Khuzwayo usekubone kanengi lokhu njalo uthi kuyadanisa okwenzakala eRamokgwebana…

“Iyadanisa indlela abantu abaphathwa ngayo. Ilanga liyabe litshisa kungelandawo zokuziphumuza kanye lamanzi okunatha ikakhulu nxa umuntu ehamba labantwana abancane kubanzima ukuma ulinde ukuthola uncedo.”

Umnunzana Thamsanqa Nare yena uthi lokhu akutshengisi ukuthi iBotswana iyamukela kuhle izethekeli.

“Kuyabuyisela emuva ngoba abantu bachitha isikhathi beme amahola amanengi, abanye bayabe befuna ukungena bephindele ekhaya langa linye. Akutshengisi thando kuzethekeli.”

Unkosikazi Sihle Maphosa laye uthi njengabantu abadala bama bazebakhathale kungela obanakekelayo. Uthi noma nje kungakhulunywa kukhanya izisebenzi zeBotswana zidinwa linengi elithululeka livela eZimbabwe.

“Sima isikhathi eside singabantu abadala abasizweli, sokungathi bazonda ukuthi singena sibanengi, kodwa thina sizebatshiyela imali.”

AbeZimbabwe bathwele nzima eBotswana bencitshwa amalanga amanengi okuvakatsha njalo bebonakala njengabantu abazodala amacala. Kodwa noma kunjalo iRamokgwebana iqhubeka iyisiphithiphithi, kulezethekeli ezidlula inkulungwane ezingamakhulu amahlanu (500,000) ezingena eBotswana zivela eZimbabwe minyaka yonke.

XS
SM
MD
LG