amalinks wokungena

Abatsha Kubandla leZanu PF Bafuna Kuxotshwe uSimon Khaya Moyo Abathi Ngowe Generation 40


Abatsha abakubandla leZanu PF bafuna kuxotshwe uMnu. Simon Khaya Moyo.

Intsha yebandla le Zanu PF esigabeni seMatabeleland South isithethe isinqumo sokuthi umphathintambo wezamandla kagetsi lokunye okufanayo, uMnu. Simon Khaya Moyo, axotshwe kulelibandla ngoba ulobundlelwano lecele lebandla leli leGeneration 40 elalisekela uNkosikazi Grace Mugabe.

UMoyo wetheswa umlandu wokuzama ukuxotsha umphathintambo wezomvikela, uMnu. Kembo Mohadi, labanye kulandela ukuxotshwa kuka Mnu. Emmerson Mnangagwa ngowaye ngumongameli, uMnu.Robert Gabriel Mugabe.

Ugatsha lwabasakhulayo lolu olwe Youth League solukhokhelwa nguMnu. Washy Nkomo, owayexotshwe kulelibandla ngomnyaka 2014 esetheswa umlandu wokusebenzelana loNkosikazi Joice Mujuru.

Abasakhulayo laba bathi uMnu. Khaya Moyo nguye obethumela amabizo alabo okwakumele baxotshwe ababalisi uMohadi lonkosikazi wakhe uTambudzani, lababalisa uMnu. Abedinico Ncube, uMnu. Obedingwa Mnguni kanye lomgcinisihlalo walelibandla eZansi yeMaNdebeleni uMnu. Rabelani Choeni.

UMohadi kanye loNcube bebekhona emhlanganweni oqhutshwe ngempelaviki emawofisini alelibandla.

UMnu. Emmerson Mnangagwa.
UMnu. Emmerson Mnangagwa.

UMoyo wetheswa umlandu wokusebenzelana leqembu leG40 ebelilwisa ukuthu uMongameli Emmerson Mnangagwa angathathi umbuso.

UNkomo uthi njengabatsha babona kufanele ukuthi uMoyo axotshwe kulelibandla.

UNkosazana Siphethokuhle Moyo loMnu. Vumani Phuthi, obephethe isihlalo esesihluthunwe nguNkomo, ngabanye osekuthiwa sokumele baxotshwe kulelibandla ngomlandu wokusebenzelana leqembu leG4O.

UMaMoyo uzame uzigeza esithi kazilutho njalo wezwa ngelikabathi ukuthi amabizo asuke kuMnu. Khaya Moyo.

Bekulokufuthelana okukhulu kulumhlangano okudale ukuthi omunye wamalunga ledale leCentral Committee, uNkosazana Rennie Kibi, aphose ukubambana lomgcinisihlalo wabesifzana. Lesi senzo sisolwe ngumgcinisihlalo walelibandla eZansi yemaNdebeleni uMnu. Rabelani Choeni.

UMnumzana Abedinico Ncube, osephenduke kuhulumende waba ngumphathintambo obona ngezenzakala eZansi yeMaNdebeleni kulandela ukuxotshwa kwakhe esikhundleni nguMugabe, uchothoze iqembu leG40 esithi abanye babo basemajele kukanti-ke abanye ngasebebaleke elizweni.

Ukungezwani kulelibandla kuqhubekela phambili kungenani lokuthi uMnu. Mugabe lonkosikazi wakhe, uGrace, oyetheswa umlandu wokusebenzelana leqembu leG40, sebaxotshwa kulelibandla.

Imizamo yokukhuluma loMnu. Khaya Moyo yehlule.

Facebook Forum

XS
SM
MD
LG