Ibandla leMDC elikhokhelwa nguNkosazana Thokozani Khupe lithi lehlulekile lamuhla ukwethulela uzulu ugwalo lweManifesto lokukhankasela ukhetho oluzayo ngenxa yokuthi lethuselwe ngabakucele lebandla leli elikhokhelwa nguMnu. Nelson Chamisa.
Ibandla leli bekumele lethulele uzulu ugwalo lolu eHarare olulesihloko esithi Building an Economy to Support Transformation kumbe B.E.S.T eMandela Hall emagcekeni eHarare Show grounds.
UMnu. Nixon Nyikadzino, unobhala jikelele webandla leli, uthe bethuselwe ngabatsha becele elikhokhelwa nguChamisa ababizwa ngokuthi yiVanguard ukuthi bazabathwalisa nzima abantu abazahamba emhlanganweni lo.
UNyikadzino uthi lokhu yikho okwenze ukuthi kubelabantu abalutshwana abahambe emhlanganweni webandla labo.
UNyikadzino uveze njalo ukuba balobufakazi ngodaba lolu njengoba sebetshele lamapholisa ngokubehleleyo.
Kodwa abebandla le MDC-T elikhokhelwa nguChamisa bakulandule lokhu besithi kuyamangalisa okukhulunywa ngabantu abakucele leMDC elikhokhelwa nguMaKhupe.
UDenford Ngadziwore, unobhala wohlangothi lwabasakhulayo eHarare kucele le MDC-T ekhokhelwa nguChamisa, uthi bona baqhuba ezokhetho hatshi ukugijimisana labantu abachitha isikhathi sikazulu besenza izinto ezingakhanyiyo.
Inkokheli yalelibandla okubalisa uNkosazana Khupe kayihambanga emhlanganweni lo ngenxa yokuthi bathi bebesethuselwa yiVanguard yecele leMDC-T elikhokhelwa nguChamisa.
