amalinks wokungena

Breaking News

'Sokumele Avinjwe Ngamanye Amazwe Uhulumende weZimbabwe Osehlamukele Uzulu'


Bakhala ngokwenzakala eZimbabwe ...
Bakhala ngokwenzakala eZimbabwe ...

Inhlanganiso ezilwela ilungelo loluntu ezibalisa eye Crisis in Zimbabwe Coalition leye Human Rights Watch sezikhuthaze amazwe omhlaba ukuthi abambe ngamandla uMongameli Emmerson Mnangagwa weZimbabwe ukuthi amise uhlelo lwamasotsha lamapholisa olokungena ezindlini bethumba, ukuhlukumeza, ukutshaya lokubulala abantu mahlayana.

Lezi inhlanganiso zithi uMnangagwa usebenzisa udlakela ukuze aqhubeke ebusa ngendlela engathandwa ngabantu.

Bekhuluma labezindaba eJohannesburg ngoLwesine, abenhlanganiso zombili lezi bathe kusobala ukuthi isimo esiseZimbabwe khathesi sesisibi njengaleso esibe khona ngo 2008.

Umqondisi wenhlanganiso yeCrisis in Zimbabwe Coalition ezansi yezwekazi le Africa, uMnu. Blessing Vava, uthe kusobala ukuthi uhulumende usehlamukele uzulu njalo abantu sebephila ngokwesaba okhwesabisayo elizweni labo.

“Ukubotshwa, ukuthunjwa, ukudlwengulwa lokutshaywa kwabantu kuyaqhubeka lobanje umongameli Mnangagwa ethe akukhulunyiswane. Nxa isimo eZimbabwe singaguqukanga, kulamathuba amakhulu ukuthi sicine singasalawuleki kucine kusiba lokungahlaliseki eZimbabwe.”

Ngakolunye uhlangothi umqondisi wenhlanganiso yeHuman Rights Watch emazweni asezansi yezwekazi leAfrica, uMnu. Dewa Mavhinga, uthi bethuswe kakhulu layindlela omantshi abathetha ngayo indaba zalabo okuthiwa balamacala okuphatheka ekutshengiseleni obekusenziwa.

“Siyakwazi ukuthi kulabantu abalimele okwesabekayo abebesesibhedlela, bakhitshwa ngodli esibhedlela, basiwa emthethwandaba ukuyathonisiswa. Lawo macala athonisiswa kungalandelwa ukulawula komthetho yemithethwandaba. Akulabameli, abantu bagwetshwa bephoswa amajele.”

Ngenxa yalokhu kuhlukunyezwa lezi inhlanganiso zithi kulabantu abanengi okumangalisayo asebebalekile eZimbabwe bayadinga ukuphephela emazweni angomakhelwana. Lesi yisimo esisolwa kakhulu yisiphathamandla senhlanganiso ye Consortium for Refugees and Migrants, uMnu. Thifulufheli Sinthumule.

“Sicela ukuthi iSADC leaders ukuthi ayibize umhlangano ikhulumisane loPresident or umongameli welizwe laseZimbabwe uED Mnangagwa ukuthi kube ne peace abantu bakwazi ukuphilisana bakwazi ukuthi bayixoxe lentole. Kungabi lokuthi impilo zabantu ziya luzeka, abantu bayashona, abantu bayashaywa abantu bayalimala kule isituation abakuyo.”

Lezi inhlanganiso ezikhuthaze inhlanganiso ezilwela amalungelo oluntu lezipha uncedo kweleSouth Africa ukuthi zemukele lokuphathisa amaxuku abantu ababalekela loludlakela bezophephela kweleSouth Africa.

Udaba Esilethulelwe NguBenedict Nhlapho
please wait

No media source currently available

0:00 0:02:33 0:00

XS
SM
MD
LG