UNkosikazi Monica Mutsvangwa, obona ngokwethulwa kwemibiko eZimbabwe, uthi ibutho lizasebenza lozulu kusukela ngoMvulo kuze kuyefika isikhathi sokuvulwa konke okuzavalwa okwamalanga angamatshumi amabili lanye ilizwe lizama ukuvimba ukumemetheka komkhuhlane weCoronavirus COVID-19.
UNkosikazi Mutsvangwa uthi akumelanga abantu bonke labenkolo ezitshiyeneyo benze imihlangano ngesikhathi abantu bevalelwe ezindlini zabo.
Uthi amasotsha azaphathisana lamapholisa ukwenzela ukuthi abantu bengephuli isinqumo sikahulumende njalo lemithetho yelizwe.
Kwele Zimbabwe kulomuntu oyedwa owabulawa ngumkhuhlane weCoronavirus phakathi kwabayisikhombisa abatholakala belegcikwane leCOVID-19.
Abezempilakahle sebehlole abantu abafika phose amakhulu amabili – 198, kwathi abafika phose ikhulu lesitshiyagalolunye – 187, batholakala bengelamkhuhlane lo. Umkhuhlane weCOVID-19 umemetheka okumangalisayo emazweni atshiyeneyo.
Loba kunjalo, abantu bakhathazwa yisinqumo sikahulumende abanye besithi kabalamali yokuthenga ukudla okuzasetshenziswa insuku kuvalwe izakhiwo ezinengi njalo ayasilela amanzi emadolobheni.
Omunye wabakhonona ngokuvalwa ngci kwelizwe okwamalanga angamatshumi amabili lanye nguNkosikazi Bekezela Khuphe ohlala koBulawayo.
UNkosikazi Khuphe uthi okunye okuhluphayo yikuswelakala kwamanzi.
Lokhu kusekelwa nguMnu. Eddie Sibanda ugcizelela esithi amanzi aludobo ahlala khona eCowdray Park okuzakwenza ukuthi kungaphumeleli ukuhlala ezindini ngesikhathi ilizwe lilwisana lomkhuhlane weCoronavirus COVI-19.
Othenga ethengisa impahla etshiyeneyo kwamanye amazwe, uNkosazana Pretty Mpofu, uthi bazalahlekelwa ngamabhizimusi ngesikhathi kuvalwe ilizwe.
Uthi bazabulawa yikucabanga ezindlini ngoba labantwana bazabe bengasela kudla bevalelwe.
Kukhanya kunzima lakubabalisi asebezihlalela ngekhaya kulandela ukuvalwa kwezikolo ngeviki ephelileyo.
UMnu. Believe Gaule, okubandla leZanu PF, ukhuthaza ukuthi abantu balandele okwethulwe nguhulumende.
UGaule uthi abantu bayakuzwisisa okwenzakalayo ngenxa yokumemetheka komkhuhlane weCoronavirus.
Uhulumende uthi lobanje kuzabe kuvuliwe enkantolo, ezibhedlela lezinye indawo, kumele abantu bahambe nxa kumele bakwenze lokhu hatshi ukwenza santando.
UMnu. Kucaca Phulu, omele iNkulumane edale lephalamende, uthi uhulumende kalandelanga umthetho esethula umbiko wokuvimba okwenzakala elizweni.
Akwaziwa ukuthi kozalankomoni kusukela ngoMvulo. Abadala bathi sizoyicela isivuthiwe.