amalinks wokungena

Breaking News

Cyril Ramaphosa: Sizimisele Ukuthuthukisa Ilizwe leZimbabwe


Iziphathamandla zikahulumende wakwele South Africa lowe Zimbabwe ziloba izivumelwano zokulima kulandela umhlangano weBi-National Commission eHarare.

Umongameli wakwele South Africa uMnu. Cyril Ramaphosa usethembise ukusiza ilizwe leZimbabwe ngazo zonke indlela anelisa ngazo ukuze lithuthukise umnotho walo omadolonzima.

Wethule lokhu ngoLwesibili emhlanganweni weSouth Africa-Zimbabwe Bi-National Commission (BNC) eHarare lapho aphinde wachothoza izijeziso zenotho ezafakelwa inkokheli yebandla leZanu PF ngamazwe entshonalanga agoqela eleMelika lele Bhilithani.

Uqhubeke esithi ilizwe lakhe lizasebenzelana lele Zimbabwe sonke isikhathi.

“ISouth Africa izinikele ukusiza iZimbabwe ngendlela eyenelisayo ukuze lenelise isinqumo sokuthuthukisa inotho yayo. Yisifiso sethu ukuthi ngohlelo lwe BNC sizenelisa ukuqinisa ubudlelwano bamazwe ethu womabili. Sizaqinisa umanyano wamazwe wetho womabili.”

UMongameli Emmerson Mnangagwa laye ubonge kakhulu uRamaphosa ngokuchothoza izijeziso zenotho eziqhubekela phambili zisinda umnotho weZimbabwe.

UMongameli Cyril Ramaphosa loMongameli Emmerson Mnangagwa
UMongameli Cyril Ramaphosa loMongameli Emmerson Mnangagwa

Uthe uhulumende wakhe uzaqhuba inhlelo zokuguqula isimo esikhona kwezombangazwe kanye lakwezamabhizimisi ukwenzela ukuthi abafuna ukusungula amabhizimusi bevela kwamanye amazwe benze lokhu becelesile.

“Ukulungisa umumo okhuthaza ukusungulwa kwamabhizimusi kanye lokuletha lemali evela kwamanye amazwe lakuleli kuphezulu kwenhloso zikahulumende wethu. Kwezombusazwe, uhulumende wami uzalondoloza ukuthula okuyikho okuqakathekileyo ekweneliseni inhlelo zethu. Sesiqalise uhlelo lokukhulumisana lamabandla atshineyeneyo.”

Kodwa uRamaphosa ubuye wakhuthaza uMnangagwa ukuthi alungisise inkinga ezixotsha osomabhizimusi bakwamanye amazwe ukuthi bazosungula amankampani eZimbabwe.

Lokhu kugcizelelwe nguMnu. Thembelihle Sihwa, ofundela ezenotho eNational University of Science and Technology, othe uhlelo olufana lokubambela amankampani eyinye imali yedola leMelika wona ethengise impahla zawo kwamanye amazwe ngemali yaphandle, kuxotsha osomabhizimusi bakwamanye amazwe.

Kodwa uMnu. Tjenesani Mtungagwa, ingcwethi kwezombusazwe lezenotho, uthi akubonakali okwenziwa nguMnangagwa osegijime wagcwala amazwe wonke edinga imali yokuvuselela umnotho welizwe leZimbabwe.

URamaphosa ubuye ephelekezelwa yiziphathamandla zikahulumende weSouth Africa ezigoqela uMnu. Tito Mboweni umphathintambo wezemali, uMnu. Rob Davies umphathintambo wokuthengiselana kanye lo Nkosikazi Lindiwe Sisulu umphathintambo obona ngokudlelana lamanye amazwe.

Udaba Esilethulelwe NguGibson Bhebhe
please wait

No media source currently available

0:00 0:04:11 0:00

Ukuhlaziya loludaba, sixoxe lengcwethi ezicubungula ezombusazwe kanye lezomnotho welizwe.

please wait

No media source currently available

0:00 0:05:13 0:00

Facebook Forum

XS
SM
MD
LG