amalinks wokungena

Breaking News

Sezivuliwe Izikolo eSouth Africa Abantu Bekhala Ngokumemetheka Komkhuhlane weCoronavirus


Student COVID-19 screening at South African school

Izikolo ziqalile ukuvulwa ngoMvulo kwele South Africa kodwa lokhu sekulethe ukwesaba kubazali beZimbabwe njengoba inani labahlaselwe yicoronavirus lababulawa yileligciwane liqonga okwethusayo.

Ukuvulwa kwezikolo kwele South Africa kwenzakala ngesikhathi lapho inanai labahlaselwe yileli gciwane selibanga kuzinkulungwane ezingamatshumi amahlanu (50,000) kanti asebefile sebedlalela kunkulungwane (1,000).

Lobanje ukuvulwa kwezikolo kuqale ngabo Grade 7 labo Grade 12, abazali beZimbabwe kweleSouth Africa bathi leli nyathelo lizafaka abantwababo engozini enkulu kakhulu.

Isizalwane seZimbabwe, uNkosazana Mercy Mvundla, uthi okwethusayo yikuthi uhulumende usanda kumemezela ukuthi indawo zokudlela, ezemidlalo lamanye amabhizimusi kuzaqhubeka kuvaliwe ngokwesabela ukuthi kungenza abantu bathelelane leli gciwane.

“Angiphathekanga kahle njengomzali ukuthi abantwana bahambe esikolo ekubeni thina njengabazali singakavumeleki inengi lethu ukuthi sibuyele emsebenzini. Okuyikuthi ukungavunyelwa kwethu kutsho ukuthi kukhona abasivikela kukho. Pho abantwana? Kutsho ukuthi siyozwa amanzi ngogodo sisebenzisa abantwana bethu.”

Leyinto egcizelelwa ngesinye isizalwane seZimbabwe, uMnu. Mlungisi Tshabalala, othi kuyamangalisa ukuthi ephalamende balokhu besesaba ukuyahlangana besebesithi abantwana beyegcwala ezikolweni.

“Bekufanele silindenyane kuze kuyefika oSeptember. Mina vele isifiso sami bengisithi lonyaka vele besizayikhansela icalendar ngisithi lonyaka its one of the years vele esingeke senza lutho ngawo. Abantwana bebuyele esikolweni next year sekungani sekuphephile. Thina singabazali sihlezi ezindlini kuthiwa sesaba lumkhuhlane kodwa abantwabethu bayahanjiswa ezikolweni.”

Abanye bathi njengoba inengi labantwana besebenzisa imitshova lamabhasi, yikho lapho abazathola khona leligciwane. Abanyeke bathi abanye bazasuka lalo emakhaya bezolithelela abanye esikolo.

Kodwa-ke umphathintambo wogatsha lwezemfundo kubanga ePrimary leSecondary unkosikazi Angie Motshekga uthi izikolo zonke ziphiwe ama mask lemithi yokuthi abantwana bageze izandla bengabanjwa yileli gciwane. Uthi abantwana bazahlala begqoke ama amask kanti njalo kabasoke babambane, basondelelane kumbe bahlale duzane duzane.

“Zonke izikolo ngaphandle kwezilutshwana, sezitholile zonke izinto ezidingakalayo ukuthi zivikele abantwana ekutholeni leli gciwane.”

Leyinto ephikiswa linengi labazali laba bona abanti yizifisonje zikaThemba lo Amkela ezizaphenduka zibeyingozi elezidumbu phansi.

Kodwake ugatsha lwezemfundo luthi umntwana ongasoke aye esikolo uzakwesulwa encwadini zesikolo. Labo abazali abafuna ukufundisa abantwana ezindlini zabo kuzafanele balandele imithetho eqinileyo kugoqela lokuvumela ugatsha lwezemfundo ukuzohlola ukuthi indlela abafundisa ngayo laba bantwana iyalandela yini imithetho yezemfundo.

please wait

No media source currently available

0:00 0:02:57 0:00


Facebook Forum

XS
SM
MD
LG