amalinks wokungena

Breaking News

Okwenzakala eZimbabwe Kuzaguqula Na Impilo Yabahlala Kwele South Africa?


FILE: Izizalwane zeZimbabwe ezibuyela ekhaya kulandela udlakelwa oluqhamuke eSouth Africa. (Apriil 24, 2015.)

Inguquko eyenzeke kwezombusazwe eZimbabwe ngomnyaka ka2017, ilakho ukuguqula inhlelo lempilo zabanengi abeZimbabwe abeseleminyaka behlala kwele South Africa.

Kusukela ngo 2000, ukuqonga kwezehlakalo zokwephulwa kwamalungelo oluntu lokuwa kwesimo somnotho elizweni phansi kukahulumende kamnumnzana Robert Mugabe kubangele ukuthi inkulungwane lenkulungwane zezizalwane zeZimbabwe ziyephephela kweleSouth Africa.

Kuleli nani kulezinye ezifike kweleSouth Africa zaphiwa imvumo yokuphephela okwesikhatshana ngoba impilo zazo bezisengozini eZimbabwe. Leliqulake selisesabela ukuthi ukungena kukamongameli Emmerson Mnangagwa osekubeke kwacaca ukuthi uxolo luhamba phambili kuye lokuthi abasemazweni abaphenduke ekhaya bengesabi, eleSouth Africa kungenzeka lithi baphindele emuva ngoba isimo sesilungile.

Isizalwane seZimbabwe unkosazana Sizwile Moyo uthi lobanje kungaba yinto enhle ukubuyela ekhaya, akusoke kube lula ukuqala impilo yeZimbabwe enzima kukanti bese bejwayelele ebutshelezi.

“Loba isimo sesingcono eZimbabwe kuzothatha isikhathi ukuze sithole imisebenzi yakhona ngoba lalaba abavele behlala khona akukabi ngcono ngoba abakatholi imisebenzi bona ngokwabo. Okunye njalo sathi sibuya lapha satshiya kungelamizi kungela lutho ngakho-ke kuzoba nzima ukuthi siqale phansi yonke into.”

Bakhona njalo abasuswa yikungamanga kuhle kwesimo somnotho bafika kwele South Africa baphiwa ama permit esikhatshana ukuze babe bebhacile kusavuselelwa ezomnotho elizweni labo. Labo laba kungenzeka baphelelwe ngumphako nxa ezomnotho zingavuka kwatshu eZimbabwe.

Banengi futhi abathi ngemva kokufundela imisebenzi ethile beza kweleSouth Africa ngoba kungela msebenzi eZimbabwe. Inengike lapha bafika benza imisebenzi ebehlisa isithunzi ukuze baphile. Labo laba bathi nxa ezomnotho zingavuka khwatshu njengokwesifiso sikahulumende kaMnangagwa kuzakutsho ukuthi sebebhekisa amabombo emuva besiyathola imisebenzi abayifundelayo.

ULizwe Khumalo, osekuGrade 11 kwele South Africa, uthi ukusuka esikolweni akiso esesiyafunda eZimbabwe kuzaba yinto enzima kakhulu nxa kukhangelwa umehluko wemfundo zamazwela womabili.

“Izifundo azifani, inani lama subjects alifani, lolimi olusetshenziswayo eZimbabwe alufani nalolu olusetshenziswa ngapha eSouth Africa like iAfrikaans neSiShona ngale eZimbabwe akufani, so kuzoba nzima ukuthi sijwayele.”

Kodwa-ke abanye abafana lo Mnumnzana Phathisani Nkomazana, bathi ekhaya kusekhaya loba kanjani bazasijwayela isimo nxa sebehlala khona.

“Abahlali baseZimbabwe kwele South Africa, ngendlela abahleli ngayo, ngibona kungabe kuyindlela enhle kakhulu uma iZimbabwe itshintsha. Labo bekunanzelela ukuba iZimbabwe iyatshintsha baphindele bayehlala phansi, bavuse leliyana lizwe, banike lo president ongenileyo okwamanje imibono naninani ukuze angamotshi futhi njengophumileyo.”

Inengi lithi liyimelele ngamehlo abomvu inguquko ezakuba khona eZimbabwe besithi bafisa kakhulu ukubuyela elizweni labo bayephila impilo ekhululekileyo hatshi emazweni lapho abahamba bekhonjwa ngeminwe, kuthiwa bazabuyela nini labo laba.

Facebook Forum

XS
SM
MD
LG