Abasakhulayo beZimbabwe esebehlala eJohannesburg kweleSouth Africa sebasungula uhlelo lokubuthanisa usizo abadabuka eZimbabwe abadubekayo abangela ndawo zokuhlala asebephila ngokulala emigwaqweni yeJohannesburg.
Emkhosini wangempelaviki babele lababantu ukudla njalo bebafundisa ngokuqakatheka kokuthatha lelithuba lokubuyela ekhaya ukuze bayobhalisa kugwalo lwabalelungelo lokuvota.
Lokhu kwenzelwa ukuthi bathole ithuba lokuguqula isimo sabo empilweni laselizweni labo lomdabu ngokuvota kukhetho oluqakathekileyo ngomnyaka ozayo.
UNkosazana Vimbaishe Musvaburi, ongumunye wabasakhulayo obaphatheke kuhlelo lolu, uthe udubo olubhekwe yizizalwane kwephula inhliziyo.
Lokhu yikho okwenza ukuthi abengomunye walabo abanceda abantu abahluphekayo.
UNkosazana Musvaburi uphinde wathi bayikhulumile indaba yokuvota loba injongo yohlelo lolu ingoyokuthi kudingelwe impahla etshiyeneyo lokudla labo abaswelayo.
“Ukukhuluma labo bhudi ngempela sikhulumile labo kodwa asiyiphathanga indaba yokuyobhalisa kugwalo lokuvota kahle ngoba injongo yaloluhlelo kwakuyikuthi sibanikeze ukudla. Kodwa sigcine sacela abantu ukuthi kube lelanga lapho esingahamba siyoxoxisana labo mayelana lokuqakatheka kokuyobhalisa lomyaka.”
UNkosazana Masvamburi ugcizelele esithi usehlangene lezizalwane ezinengi ezingela mandla njalo ezingaboni kahle ezihlala emigwaqweni.
Njengoba isikhathi somqando sesiyaqala kwele South Africa, uNkosazana Musvamburi uthe bazakwenza olunye uhlelo ngeviki ezayo lapho abazaqoqa khona ingubo zokunika abahluphekayo.
Abafisa ukubambisana loNkosazana Musvaburi kuhlelo lolu bangamthintha kukhasi lakhe, ebulenjini bokuzilibazisa obeFacebook, ngaphansi kwegama lakhe kumbe kunombolo ezithi +27720556727.
