Abanye abantu eZimbabwe ngoMvulo bananze usuku oluqakathekisa amaqhawe olweNational Heroes Day.
UMongameli Robert Mugabe ngomunye walabo abananze ilanga leli eNational Heroes Acre lapho atshele khona umphakathi ukuba omunye wabasekeli bakhe, uMnu. Emmerson Mnangagwa, ocatshangelwa ukuba wafakelwa itshefu ekudleni emhlanganweni eGwanda, usesibedlela eJohannesburg kwele South Africa.
UMugabe kavezanga okwehlele uMnangagwa njalo ngokuthi uzwa njani okwamanje.
Ubelibaziswa ngendlela ezehlukeneyo uzulu,okubalisa ingoma ebezimumethe ubuhlungu, ngokwakwenzakala ngesikhathi sempi, ziculwa yichoir yamapholisa.
Uzulu obethe gwaqa emkhosini owenzelwe e National Heroes Acre, eHarare, lobesele emakhaya, ubelindele ukuzwa okunengi phezu kokugijinyiswa kukaMnangagwa esibhedlela, kwele South Africa.
Kodwa utshengise ukukhathazeka ngesehlakalo sokutshaywa kwamapholisa ngabakubutho.
Umphathintambo wezempilakahle uDr. David Parirenyatwa, nguye ongathi uphathe kabanzi ngesimo sika Mnangagwa.
Uzulu weHarare, okubalisa umnumzana Sibangani Ndiweni, uthi kuyasolisa lokho okwenzakale kuMnangagwa.
Wengeza ethi lanxa evumelana lenkulumo kaMugabe, kokwenzakala kwabezomvikela lapho basebetshayana bodwa, kodwa ufisa ngabe uyabakhuza ngendlela inye lapho bethe bahlukumeza uzulu.
Embikweni wakhe, awethule ngalolusuku lokunanza imisebenzi yabalwa impi yenkululeko, umkhokheli webandla eliphikisayo le MDC- T, uMnu. Morgan Tsvangirai, uthi kuyadanisa ukuba abalwa impi yenkululeko kabanakekelwa kangako.
Uqhubeke elibaziswa ngomculo otshiyeneyo uzulu lapho umongameli Mugabe lenkokheli yakhe, beye kuyabeka amaluba ethuneni elimmela amaqhawe wonke atshonela empini yokukhulula eleZimbabwe ele Tomb of the Unknown Soldier.