Ngesikhathi omama emhlabeni wonke jikelele bethakazelela usuku lwe Mothers’ Day, abadaquka eZimbabwe abahlala kwele South Africa abakunhlanganiso yeZim Imbokodo bahambe emzini wabantu asebekhulile owe Nazareth House elokitshini leYeoville eJohannesburg.
Umgcinisihlalo wenhlanganiso yeZim Imbokodo, uNkosazana Victress Mathuthu, uthi bacabange ukuthi ngalel’ilanga labomama bazincitshe bona intokozo bayiphe asebekhulile abayidinga kakhulu.
“Sicabange ukuthi kesenze okutshintshileyo kesivakatshele omama la eNazareth House sizocelebrator labo usuku lweMothers’ Day. Ukuthi njengoba belaphanje bekwazi ukuthi singabantwana phandle, siyabaqakathekisa njengabomama, njalo baqakathekile bazohlala beqakathekile njengabomama. Sithi sike sibajabulise omama sike sibe lesikhatshanyana labo.”
Inengi labagcinwe kul’indawo ngasebekhulile abangasenelisi ukuzigezela kanti abanye badinga usizo nxa besiya esambuzini. Inengi labo alenelisi ukukhuluma okuzwakalayo kwazise lendlebeni abasezwa kahle.
Isikhulumeli senhlanganiso yeZim Imbokodo. uNkosikazi Corrence Mkhosi Ncube, uthi lobanje asebekhulile laba bethola phose konke abakufunayo empilweni, abakuswela kakhulu yikwethekelelwa lokutshengiswa uthanndo.
“Abanye sebekhala bafisa ukuthi ngabe sihlala nabonje usuku lonke, kodwa ngenxa yomsebenzi wethu asikwazi ukuba nabo usuku lonke kumele siyevakatshela omama kwezinye indawo. Sizobatshiya kunjalo kodwa bayakhala abanye balokhu besilandelanje njengobanje sithenje sibakhumbuze ukuthi balokhu besasengomama bethu. Noma singahlali nabo emakhaya la abakhona sisabakhumbula.”
Ngaphandle kokuqhunsa ingxoxo lohleko lasebekhulile laba, omama beZimbabwe laba bebebaculela imiculo yomdabu begida kuluthuli.
UGogo uPamela oleminyaka engamatshumi ayisikhombisa lantathu (73), uthe bekungokwakuqala ukuthi ngelanga labomama bathole intokozo enjengale.
“Yebo, yebo kuhle okumangalisayo lokhu ikakhulu ngosuku lwabomama ... Ngibuthakathaka. Angilamuntu ongethekelelayo.”
Omama beZimbabwe laba bathi okunye okuqakathekileyo ngokwethekela kwabo lokhu yikuthi izizalwane zakwele South Africa zikwazi ukuthi akusibo bonke abeZimbabwe abafika la badale amacala, kodwa kusasekhona abalobunto abangancedisana leleSouth Africa ekuthuthukiseni umphakathi.
Asebekhulile laba bakhombise usizi olukhulu ngesikhathi sokwehlukana.
