Ababalisi ngoLwesibili balandele isinqumo esithethwe zinhlanganiso zabo sokuthi bakhalale umsebenzi kulandela ukungezwani kwabo lohulumende kudaba lokwengezelelwa uholo lwabo.
Inhlanganiso ezimela amalungelo ababalisi ngoMvulo zethule umbiko ezikolweni zonke wokwazisa amalunga ukuthi engayi emsebenzini.
Kodwa umphathintambo wezemfundo, uMnu. Paul Mavima, wethule umbiko emisakazweni yeZBC othi ababalisi bamukele abakuthenjiswe nguhulumende okwenze abanye ababalisi baye emisebenzini.
Kodwa inhlolisiso eyenziwe yiStudio 7 iveze ukuba emadolobheni anjenge Mutare leHarare abanye ababalisi akade beze emsebenzini babuyele emakhaya ngoba kuthe kufika emini besekutshaya umoya ezikolo.
Umkhokheli wenhlanganiso yababalisi eyeProgressive Teachers Union of Zimbabwe, uMnu. Takavafira Zhou, uthe inani lababalisi elingabuyanga emsebenzini belisedlula isilinganiso sokungamatshumi ayisikhombisa lanhlanu ekhulwini - 75 %.
“Inengi lababalisi lilandele umqondo wokukhalala umsebenzi … Elizweni lonke endaweni ezifana leMutare, iMatabeleland, Mashonaland kanye leHarare, iGweru leMasvingo inani lababalisi elikhalale umsebenzi namhla ledlula amatshumi ayisikhombisa kuhulu elilodwa - 75%.”
UZhou uthe njengababalisi bakhathazwa yimibiko ethi ezikolweni zemaphandleni amalunga abo ebesethuselwa yintsha yeZANU PF labanye akade besithi bangamasotsha.
Uthe lokhu kuveza ukuba uhulumende usethatha udaba lwababalisi njengolwezombusazwe.
“Ibandla le Zanu PF lithumele intsha yalo labanye abangaqondakaliyo besethusela ababalisi abangayanga emsebenzini namuhla. Kodwa okusobala yikuthi ukwethusela kwamabandla ezombusazwe akusoze kusebenze. Ukukhalala kwethu umsebenzi sikwenze ngendlela esemthethweni ngoba isisekelo sombuso sisinika imvumo yokukhalala umsebenzi nxa silezikhalazo.”
UMavima uthe uhulumende uzaphuma lenhlelo zokuthuthukisa impilo zababalisi ezifana lokubanika indawo zokwakha izindlu ngesikweledi.
Kodwa lokhu akuthokozisanga ababalisi bona abathi abasoze babuyele emsebenzini nxa bengengezelelwanga iholo lafika kumadola azinkulungwane lamakhulu amabili nxa behlaulwa ngeRTGS -$1,200 kumbe ngedola leMelika.
