Ababalisi bathi sebebuyela emsebenzini ngoba uhulumende uthembisa ukwenza phose konke abakufunayo okugoqela ukukhuphula iholo labo.
Bethule umbiko lo kulandela umhlangano abawenze eHarare ngeSonto leziphathamandla zikahulumende.
Ababalisi bakhalala umsebenzi ngeviki ephelileyo besithi bafuna ukuholiswa amadola eMelika njalo lokuthi uhulumende akhuphule ama allowances leholo labo.
Uhulumende uthi kalamali yokuholisa izisebenzi ngamadola eMelika.
UMnu. Abbot Moyo, ilunga lenhlanganiso yeProgressive Teachers Union of Zimbabwe, utshele umsakazo weStudio 7 ukuthi bazamelela babone ukuthi uhulumende uzabenzelani.
"Sizamela okuzakwethulwa nguhulumende owazi mhlophe ukuthi sizakhalala njalo umsebenzi nxa singatholanga esikufunayo. Okwamanje sibapha ithuba lokuthi badinge imali yokusiholisa iholo elikhuphukileyo."
Odokotela labo bakhalala umsebenzi nyakenye befuna ukuthi uhulumende abaholise idola leMelika. Kodwa-ke uhulumende wathi kalamali yokubaholisa ngama dola eMelika.