Obona ngokuphiwa kwabantu amaphepha okuzalwa, uMnu. Tobaiwa Mudede, uthi abantu abalabazali bokuza kabasoze bavote kukhetho luka2018.
Ekhuluma leStudio 7 ngoLwesithathu, uMudede uthe abantu laba, ababizwa ngokuthi ngama aliens ngesingisi, kumele batshintshise izithupha zabo ehofisini yakhe babe yizizalwane zaseZimbabwe ezipheleleyo ukuze benelise ukuvota.
Kodwa uthe lokhu akusoze kwenzeke kalula nje ngoba kuthatha isikhathi eside ukutshintsha amaphepha la.
Wengeze wathi akasoze atshetshise uhlelo lolu ngenxa yabantu abafuna ukuvota.
Kodwa abamabandla aphikisayo bachothoze uMudede besithi umthetho ukubeka sobala ukuthi abantu abalabazali bokuza laba bayizizalwane zeZimbabwe nxa bazalelwa elizweni.
Okudingakalayo nje yikuthi bayetshintshisa izithupha zabo zibe ngezithwele ubuzwe beZimbabwe obupheleleyo.
Umsekeli wesikhulumeli seMDC-T, uNkosazana Thabitha Khumalo, usole uMudede esithi kafuni ukuthi abantu laba bavote ngoba ekwazi ukuthi kabasoze bavotee ibandla leZanu PF.
