Kulabadabuka eZimbabwe abahlala kwamanye amazwe abavalelwe eTownsend High School abathi bathwele nzima kuleyondawo.
Bathi bafakwa esikolo lesi besanda kubuyela ekhaya bevela kwele South Africa, eBotswana lamanye amazwe kusenzelwa ukuthi kuvinjwe ukumemetheka kweCOVID-19.
Abakhulume lomsakazo weStudio 7 bathe kuzwisa usizi okwenzakala eTownsend High School okulabanye abagulayo labanye abaphile kahle abahlangana endaweni zokugeza, ezokudla lezinye.
Sixoxe labambalwa abathi sebezame ngamandla wonke ukuthi bakhulumisane lohulumende ngodaba lolu.
Omunye wabo, ongafisanga ukuthi siveza igama lakhe, uthi kulabanye njalo asebebaleka esikolo lesi bengakatshelwa isimo sabo.
Kasenelisanga ukukhuluma ngodaba lolu lomphathintambo wezempilakahle uRetired General Constantino Chiwenga, obengaphenduli umakhalekhukhwini wakhe.
Iziphathamandla zohlangothi lwezempilakahle eMatabeleland ziyalile ukukhuluma ngodaba lolu.
Sokulabantu abedlula ikhulu lamatshumi amahlanu – 153 asebebulewe ngumkhuhlane weCOVID-19 eZimbabwe phakathi kwabafika phose inkulungwane eziyisithupha – 5,893 asebahlolwa batholakala bele coronavirus.
Uhlangothi lwezempilakahle luthi kunani leli, sokulabantu abafika phose inkulungwane ezinhlanu – 4,629 asebephephe kumkhuhlane weCOVID-19.
