Ikhomishini ebona ngezokhetho eyeZimbabwe Electoral Commission (ZEC) ngoMvulo iqalise ukubhalisa amagama abavoti kusetshenziswa imitshina ye Biometric Voter Registration koBulawayo lasesigabeni se Umguza.
Kubekulenkinga ezimbalwa ezibalisa ukungaphumi kahle kwamabizo endawo zokuvotela, ukuphuza ukuqala kohlelo, ukungabi lengwalo eziqondileyo zekheli kanye lokungaphumi kahle kwezithombe.
UBulawayo utholiswe amaBVR kits azasetshenziswa ukubhalisa abantu ukuthi baphatheke ekhethweni lomnyaka ozayo alikhulu eli letshumi.
Ababhalisayo ukuvota bangabhalisa endaweni lapho abakhona nxa belamaphepha aqondileyo. Amabizo ababhalisileyo azaphuma endaweni eyodwa yokuvotela eseduze lalapho abahlala khona abazavotela khona njalo.
Uhlelo lokubhalisa abafuna ukuphatheka kukhetho lomnyaka ozayo luzakwenziwa ngamahlandla amane koBulawayo.Amahlandla lawo azakhangela indawo eziphithizelayo eziqintini zako Bulawayo.
Ekhuluma esemawofisini eZEC uDistrict Elections Officer, uNkosikazi Sithembiso Khuphe, uthe uhlelo lolu lokubhalisa lukhangelele ukufinyelela abantu abafika inkulungwane ezingamakhulu amane lamatshumi amane lane (444 000) koBulawayo kuphela, endaweni zokubhalisa ezilikhulu lasikhombisa (107).
UMn. Nkosana Mpofu, osuka eNkayi, wenelisile ukubhalisa ukuvota ethi loba ebengela ncwadi ekhombisa lapho ahlala khona kodwa uthole usizo eZEC. Uthe inking ezabakhona ngumango ozahanjwa ngabantu besiyabhalisa ngoba iUmguza District inxele.
Omunye owenelise ukubhalisa koBulawayo, nguMnu. Austin Moyo, osuka eCowdrayPark, uthe yena ubhalise kuhle kazange abelenkinga ethi kumele bazame ukuguqula ukuthatha izithombe ngoba kulesibane esingakhanyisi kuhle.
Amawofisi akoBulawayo ebengela khomishina ongceda abaze bengelancwadi zekheli okwenze uNkosikazi Idah Jele uyehluleke ukubhalisa ukuvota ngoba inombolo yendlu eveza lapho azavotelakhona ayihambelani laze layo ukuzobhalisa ukuvota.
Umsunguli wesiziba ekubhaliseni ukuvota uMnu. Abel Ncube ufike emawofisini okubhalisa ngo8 ekuseni waze wayenelisa ukubhalisa ngo10 ekuseni ngoba izisebenzi zeZEC bezizaxhumanisa imitshina.
Udubo olubhekane loMnu. Ncube yikuba indawo abemele avotele khona ayiphumi emtshineni weBVR kodwa isehlelweni lokuthi abantu bazavotela khona.
Ngemva kokubhalisa ukuvota uNcube uphiwe iphepha elidindwe ngomtshina azalisebenzisa ukuhlola ukuba ukhona kuluhlu lwabazavota, njalo ulakho ukulisebenzisa ukuvota uma ibizo lakhe lingatholakala
lingekho kuluhlu lwabazavota.
Uhulumende uqale uhlelo lokupha abantu izithupha kunye lengwalo zokuzalwa phambilini kokuba baqale ukubhalisa ukuvota ukwenzela ukuthi abantu benelise ukubhalisa ukuvota sebelezithupha kodwa izithupha abaziphiwayo azilazithombe okuzakwenza ukuba behluleke ukubhalisa ukuvota.
Kusukela lamhlanje iZEC iphakathi kokufundisa abantu abedlula amakhulu amathathu ukwamalanga amabili abazabhalisa abantu ukuvota koBulawayo.
Ngemva kokubhalisa ukuvota abantu bazabizwa njalo ukuba bezohlola ukuba amabizo abo akhona kuluhlu lokubhalisa ukuvota kodwa amalanga akhona awakabunjwa.
Ekubhaliseni ukuvota kudingakala isithupha sephepha, esezenge leseplastic, ipassport esebenzayo kunye lencwadi ethengisa ikheli yalapho umuntu ahlala khona.