amalinks wokungena

USamson Muroyiwa Wenza Izimanga Kumncintiswano Wama Wheelchair

  • Joseph Njanji

USamson Muroyiwa

USamson Muroyiwa ngumdlali wokuncintisana ngama wheelchair kodwa ekuqaleni kwakhe ezemidlalo ubedlala umdlalo we wheelchair tennis.

Umdlalo wokuncintisana ngama wheelchair ungene kiwo ngomnyaka ka 2012 lapho abeyingxenye yeqembu labadlali bakwele Zimbabwe abaphatheke kumncintiswano we Outeniqua Wheelchair Challenge oqhutshelwe endaweni ye George elizweni le South Africa.

“Umdlalo we wheelchair ngiwuqale ngomnyaka ka 2012 ngize ngihambe eSouth Africa lapho engaqeda khona ngikundawo yesibili kumjaho we 42 kilometres.’

Ngomnyaka ka 2013 uMuroyiwa ubuyele njalo kumncintiswano we Outeniqua Wheelchair Challenge lapho afike wanqoba khona kumjaho we 42 kilometres kusigaba se T53/54.
Lapha ekhaya ayikho minengi imijaho eyohlobo lwe marathon yikho uMuroyiwa ucina encintisa kumijaho ephakathi laphakathi eye middle distance lapho atshona eqeda khona esendaweni yesibili engamva kuka Elford Moyo.
Ekhuluma ekupheleni komncintiswano we PPC Matopos 33 Miler oqhutshwe ekuqaleni kwenyanga kaMabasa uMuroyiwa uthe yena utshiywa emehlweni ngoba uMoyo elesisindo kulaye.

“Lamhlanje ngidonsile bengilaye sibili kodwa ungitshiya emehlweni ngoba mina angila weight kuthi yena ule weight kuyafana nje leGonyeti emehlweni ligijima kakhulu lifuqwa ngumthwalo walo.”

Lonyaka uMuroyiwa ungenile njalo kumncintiswano we Outeniqua Wheelchair Challenge kodwa akumhambelanga kuhle njengoba ephutshe esendaweni yetshumi lesikhombisa kumncintiswano oqhutshwe ngenyanga ka Nhlolanja.
Ekuqaleni kwenyanga kaMabasa uMuroyiwa uphatheke kumncintiswano we PPC Matopos 33 Miler emjahweni we 21 kilometres lapho aqede esendaweni yesibili engemva kuka Moyo. Sixhumane laye ekupheleni komdlalo lapho athe yena uzakuyancintisa phetsheya kolwandle inyanga kaMabasa ingakapheli.

“Mhla zingamatshumi amabili lathoba munwe munye ngizakuyancintisa kwele South Korea njalo ekuphendukeni kwami ngicabanga ukuthutha eZvishavane ngiphenduke ngapha koBulawayo ukuze ngizilolonge labanye.

UMuroyiwa uleminyaka eyokuzalwa engamatshumi amabili lathoba minwe mbili (28).

Facebook Forum

XS
SM
MD
LG