amalinks wokungena

Mugabe: Kumele Kuhlonitshwe Wonke Umuntu eZimbabwe

  • Mavis Gama

UMongameli Robert Mugabe uthi kumele abantu basebenze ngokumanyana behlonipha izifiso zabanye kwezombusazwe lakwezokholo.

Ekhuluma embuthanweni wokunanza ilanga likazibuse lilizwe leZimbabwe inkundleni yeNational Sports Stadium eHarare ngoLwesibili, uMugabe uthe isiqokoqela yikwazi ukuba umuntu wonke ngowe Zimbabwe kungakhathalekile ukuba kulokwehlukana kwemibono.

Mongameli Robert Mugabe
Mongameli Robert Mugabe

Abezokholo labo okubalisa uMfundisi Tapfumaneyi Clement Zenda wase Masvingo uthe lanxa kumangalisa lokho osekukhankaselwa nguMugabe, kwezokuhloniphana kundaba zombusazwe, bayakwamukela.

UMfundisi Zenda uthe yikho kanye abahlezi bekuthandazela njengamakholwa esiKhristu ukuba kube lokuhloniphana kwemibono.

Kodwa abanye bakwamukela ngokuthandabuza besithi akusiqiniso okutshiwo nguMugabe. Bambeka umlandu wokuba nguye imbangela yokukhethana lokungezwani kwabantu elizweni lasebandleni lakhe kusukela ngesikhathi kuliwa impi yenkululeko.

Omunye walabo abangasuthiseki ngalenkulumo kaMugabe nguNkosazana Leah Mthandwa, umgcinisihlalo wohlangothi lwabasakhulayo, enguye njalo unobhala jikelele ebandleni eliphikisayo le Freedom Front, othe akuthenjwa okukhulunywa nguMugabe.

Bekuthakazelelwa uzibuse kwele Zimbabwe.
Bekuthakazelelwa uzibuse kwele Zimbabwe.

Wengeza esithi makaqale ebandleni lakhe uMugabe ukuqeda lolodubo lokungezwani, ukukhethana ngemihlobo kanye lokungemukeli imibono eyehlukeneyo lokutshelana iqiniso nxa kulokuphosisa okuthe kwaba khona.

Lokhu kusekelwa ngunobhala jikelele wohlangothi lwabasakhulayo ebandleni le People’s Democratic Party, uTatenda Chigwada.

Bakhona njalo abathi bazoyicela isivuthiwe ngoba kamamthembi uMugabe, osowabusa ilizwe leZimbabwe okweminyaka engamatshumi amathathu lasikhombisa – 37.

Facebook Forum

XS
SM
MD
LG