amalinks wokungena

Breaking News

Iqembu leHarare City Liphelelwa Ngumphako ku-Zone VI Club Volleyball Championships


Liphelelwe ngumphako iqembu leHarare City.

Iqembu lomdlalo we volleyball elabesilisa ele Harare City seliphelelwe ngumphako kumncintiswano we Zone VI Club Volleyball Championships oqhutshelwa edolobheni lako Bulawayo kulezinsuku.

Umncintiswano we Zone VI Volleyball Club Championships ungene kusuku lwesithathu namhla njalo sekusobala ukuba iqembu le Harare City elabesilisa seliphelelwe ngumphako ngemva kokudliwa kumidlalo emibili eliyidlale ngoMgqibelo langeSonto.

Iqembu le Harare City likusibaya sika Group A esilamaqembu amane njalo aliselakho ukudluela phambili njengoba lilomklomelo owodwa okutsho ukuba alingeke lithole lelo elihlezi kundawo yesibili engalaneni ele Green Eagles elilemiklomelo emihlanu loba lingaze linqobe emdlalweni walo owokucina.

Ngaphandle kweqembu le Harare City elabesilisa inengi lamaqembu amela ilizwe le Zimbabwe kulumncintiswano athuthukise amathuba awo awokudlulela kusigaba esilandelayo.

Kumncintiswano wabesifazane iqembu le Harare City liqhuba kuhle kakhulu njengoba lihlezi phezu kwengalane yemiklomelo kusibaya sika Group A lilemiklomelo eyithoba minwe mbili ngemva kokunqoba ele Botswana Defence Forces nge 3 ka nya kuthi ele UZ Wolves linqobe okwakuqala kulumncintiswano lapho litshaya ele Moyale Barracks elase Malawi nge 3 ka nya okuyimpumela elitshiye lihlezi lilemiklomelo emithathu.

Kusibaya sika Group B ele Spartans linqobe ele Lesotho Defence Forces nge 3 ka nya.

Umdlali weqembu le UZ Wolves uChristabel Sibanda uthi ukunqoba kwabo kubabeka esimeni esihle esokudlulela kusigaba esilandelayo esomncintiswano.

“Kubemnandi ukunqoba okwakuqala njalo ukunqoba kwethu esikwenzileyo kutsho ukuthi sesingadlulela phambili siye kuma quarter – finals okuyinto ebesivele siyikhangelele ukuthi siyenze ngoba kumncintiswano owadlulayo yithi esathatha isicoco.”

Kucele labesilisa iqembu le UZ Wolves litshaye ele University of Zambia nge 3 ka nya okuyimpumela elitshiye lihlezi endaweni yesibili engalaneni yemiklomelo kusibaya sika Pool C lilemiklomelo emihlanu.

Kusibaya sika Group D bekudibene amaqembu akuleli athi ele NABA kanye lele Black Rhinos njalo ele NABA yilo elinqobe nge 3 ka nya.

Imidlalo iqhubekela phambili kusasa lapho okuyikhona okuzacaca khona ukuba yiwaphi amaqembu azadlulela kusigaba sama quarter – finals ngoLwesithathu.

Udaba Esilethulelwe NguJoseph Njanji
please wait

No media source currently available

0:00 0:02:09 0:00

Facebook Forum

XS
SM
MD
LG