Kube lokuxokozela okumangalisayo eHarare ngesikhathi abantu behlola amagama abo kugwalo lokuvota olwe voters’ roll.
Ukuxokozela lokhu kwenziwe yikuthi abantu abanengi kade bengakwazi ukuthi bayengaphi ukuyahlola amagama abo kugwalo lwe provisional voters’ roll.
Omunye walabo abalokhe bengakwazi abakwenzayo nguMnu. Bhekinkosi Sibanda.
"Ngokwani vele ngoba mina angikabi kwazi ukuti kuyenzwa njani, ngaphi. Selokhu ngaregistayo, ngimelele ukuthi ngiye vota kuphela … Mhhhh okwe inspection angikwazi."
Kulabanye njalo abanjengo Mnu. Sindiso Nyathi abathi kabatholanga amagama abo kugwalo lokuvota.
"Mina ngihlala eChitungwiza. Ngihambe ngaya inspector eMbare, so, eMbare bathe ngibuyele eChitungwiza. Mina ngiyazisebenza so ngivuka ekuseni ngiphenduke soku late endlini. Bayabe sebevalile lapho okukhangelwa khona amagama ethu. Kodwa-ke ngizabona okokwenza.”
Esinye isakhamuzi seHarare, uMnu. Mkhathini Ndlovu, ohlala elokitshini leBudiriro, ubengakwazi ukuthi amabizo aseqalile ukuhlolisiswa njalo sowatshintsha indawo ayehlala kiyo.
"Okungenze ukuthi ngingahambi ukuyakhangela ibizo lami eluhlwini labantu abazavota yikuthi bengingakwazi ukuthi kuyahanjwa kuyekhangelwa amabizo. Okunye yikuthi sengitshintshile indawo yokuhlala. Ukuthi ngibe ngilokhe ngisiya lapho engangihlala khona yikuthi kuyangibambelela"
Kesenelisanga ukuxoxa leziphathamandla zeZimbabwe Electoral Commission eziqhuba uhlelo lolu.
Uhlelo lokuhlola amagama kugwalo lolu oluqalise lamuhla luzaqhitshwa mhlaka 29 ngoNkwenkwezi. Abangabhalisanga kugwalo lolu balakho ukubhalisela ukuvota kuze kuyephela inyanga.