amalinks wokungena

Ukuxokozela Kuqembu Lama Warriors Kungaphazamisa Imidlalo Yeqembu Leli

  • Joseph Njanji

Iqembu leZimbabwe Warriors

Iqembu elimela ilizwe emdlalweni wenguqu elama Warriors likhangelelwe ukudlala lele Cameroon ngoLwesibil emdlaweni wokuzwana amandla kuyingxenye yamalungiselelo yalo awokuyadlala kumncintiswano we Africa Cup of Nations (AFCON).

Iqembu lama Warriors lize laphakama lilubhekise kwele Cameroon ngeSonto ngemva kokuba kube lobubelo kungxabano yabo lenhlanganiso ye Zifa kubangwa imali yeholo.

Abadlali kade befunga begomela ukuba kabasoze bayephatheka kumncintiswano we AFCON nxa bengaphiwanga imali abazikolodwa yinhlanganiso ye Zifa.

Bebengasuthiseki futhi ngaleyo mali abakade beyithenjisiwe ngesikhathi bephatheka kulumncintiswano.

Inhlanganiso ye Zifa ndawonye lohulumende kanye lenhlanganiso ye NetOne bacine bevuma ukupha abadlali inkulungwane ezinhlanu zamadola eMelika, okuyiyo imali abakade beyikhalela.

NgoLwesibili iqembu lama Warriors likhangelelwe ukudlala lele Cameroon emdlalweni wokuzwana amandla njalo likhangelelwe ukuthi lizabe lilokhe lizilolonga likulelolizwe lize liphakame ngoLwesine mhla zilitshumi lambili insuku kunyanga kaZibandlela selilubhekisa kwele Gabon okuyikho okuzaqhutshelwa khona umncintiswano we Afcon.

Intathelizindaba yezemidlalo, uNation Ndlovu, uthi akalalo ithemba lokuba iqembu lama Warriors lizakwenza kuhle kwele Gabon nxa ekhangela indlela ilizwe le Zimbabwe elilungiselele ngayo lumncintiswano we Afcon.

“Ingxabangxoza eke yabakhona leyi lendlela abayenze ngayo amalungiselelo akutshengiseli ukuba njengelizwe sizimisele."

Amabhola azadlalwa khonale kwele Gabon obekumele iqembu liwasebenzise lizilolonga abuya kudala kodwa abanjwa yi ZIMRA, abafana kade bekhala ngemali kodwa inhlanganiso yeCaf kudala yapha amazwe izimali zokulungiselela imidlalo.

“Inkinga yethu thina njengeZimbabwe yikuba sikhangelela ukunqoba loba nje thina siyenze okokuthi yekela kukhule lokhula.”

Kungenzeka njalo ukuba iqembu le Zimbabwe lingqikilane lele Democratic Republic of Congo lalo elizilolonga lise Cameroon phambilini kokuba lidlulele kwele Gabon.

Iqembu lama Warriors lona elikusibaya sika Group B lizadlala umdlalo walo wakuqala ngeSonto lapho elizangqikilana khona lele Algeria ngehola lesithupha ntambama ikanti omunye umdlalo wesibaya sika Group B uzakuba phakathi kweqembu le Tunisia lele Senegal ngehola lethoba munwe munye ntambama.

XS
SM
MD
LG