amalinks wokungena

Breaking News

Iqembu leWest Indies Linqoba eleZimbabwe Kumdlalo Kakhilikithi


FILE: Umdlalo weZimbabwe lePakistan.

Iqembu elimela ilizwe leZimbabwe emdlalweni kakhilikithi linqotshwe okwakuqala kumncintiswano owokudinga amazwe azakuyaphatheka kumidlalo yezizwe zomhlaba ngomnyaka ozayo lapho litshaywa ngama wickets amane liqembu le West Indies ngoMvulo.

Iqembu le Zimbabwe yilo eliqale ukutshaya ibhola labuthelela ama runs angamakhulu amabili lamatshumi ayithoba minwe mbili lethoba munwe munye (289) lilahlekelwe ngabadlali balo bonke kwathi ele West Indies seliphendula lenelise ukuthola ama runs angamakhulu amabili lamatshumi ayithoba munwe munye sekusele amabhola ayisithupha ukuba liqede ama overs alo angamatshumi amahlanu njalo selilahlekelwe ngabadlali abayisithupha.

Limpumela itsho ukuba iqembu le West Indies yilo eselindize layahlala phezu kwengalane yemiklomelo lilemiklomelo eyisithupha kuthi ele Zimbabwe lehle layahlala endaweni yesibili lilemiklomelo emihlanu.

Womabili lawa maqembu alakho ukuba yiwo angafinyelela ukuyadlala kumncintiswano wezizwe zomhlaba ozaqhutshelwa elizweni le Ngilandi ngomnyaka ozayo nxa enganqoba emidlalweni yawo eyokucina njalo ukaputeni weqembu le Zimbabwe uGraeme Cremer uthi ulethemba ukuba bazakufeza lokho.

“Aluba besinqobile namhla besizadlala umdlalo wethu owokucina sikhululekile kodwa akusenzakalanga njalo yikho akusoze kube lula emdlalweni wethu owokucina kodwa sizazama ngamandla ethu wonke ukuthi sihle siqale umdlalo sisidla amahabula.”

Iqembu le Zimbabwe lizadibana lele United Arab Emirates emdlalweni walo owokucina owesigaba se Super Six ngoLwesine kuthi ele West Indies lona lizadibana lele Scotland ngoLwesithathu.

Amaqembu azaphutsha imidlalo ye Super Six esendaweni ezimbili eziphezu kwengalane yiwo azakuyaphatheka kumncintiswano wezizwe zomhlaba ikanti azangqikilana kudingwa ukuba yiliphi iqhude elikhulu kulimidlalo eqhutshelwa kwele Zimbabwe.

Facebook Forum

XS
SM
MD
LG