Inkulungwane lenkulungwane zabantu ngoLwesithathu bezithe gwaqa enkundleni yeOrlando eSoweto kwele South Africa enkonzweni yesikhumbuzo sikamuyi uNkosikazi Winnie Madikizela Mandela.
Bekuyinkonzo engajwayelekanga exhubene usizi lentokozo. Abanye bathi lokhu bekungenxa yokuthi bekukhunjulwa iqhawekazi, eladela impilo ukuze ilizwe leSouth Africa likhululwe embusweni wabamhlophe.
Enkonzweni yesikhumbuzo sikaNkosikazi Madikizela Mandela bekuleziphathamandla zikahulumende, ezamabandla ombusazwe ashiyeneyo kanye labasekeli bamabandla ezombusazwe inengi labo kungabebandla elibusayo ele African National Congress (ANC).
Omunye wabakade bekulo umbuthano nguNkosikazi Buhlebemvelo Ngidi, ohlala eSoweto, ochaze umuyi njengomunye wabenze iSouth Africa ize ibe yikho eyikhokhona lamhlanje.
“Umama wethu sonke. Ngithanda ukuthi hambakahle qabane. Sizokukhumbula. Sibuhlungu ngokuhamba kwakho kodwa sizoqhubeka ngalapho ogcine khona sililwele izwe lethu.”
Ngakolunye uhlangothi uMama uPhetheni, ohlala elokitshini leZola, uthe izwekazi leAfrica lingalandela emanyathelweni kamuyi inkinga ezihlasele amazwe amanengi zizaphela.
“Umuntu osilwele thina siyimbokodo sazi ukuthi abafazi kufanele babe le say emphakathini wase South Africa. Sisalwa. Sisayilwa lempi. Sithi aluta continua lapho owawuyisho khona siqhubeka ngayo. Ngicela ukuthi uhambe kahle. Anginawo amazwi amanengi, Nomzamo Madikizela. Hamba kahle.”
UNkosikazi Madikizela Mandela ubhubhe ngeviki ephelileyo eseleminyaka engamatshumi ayisitshiyagalombili lanye (81).
Yenake udume kakhulu ngesikhathi ekhokhela inhlelo zempi yomzabalazo ngesikhathi owayengumkakhe umuyi UNelson Mandela esejele.
Wayesilwa kakhulu endaweni zonke lapho amabhunu eyehlukuluza khona abantu abamnyaka baze bamenqabela ukufika endaweni ezithile kwesinye isikhathi beyemvalela ejele kumbe endaweni lapho azahlala khona yedwa kungekho omunye umuntu.
Induna uMangomhlaba Mathanzima okhulume emele imuyi kamuyi uthe ebunzimeni obunjalo wenelisa ukunakakela imuli yakhe waba ngumama aphinde abe ngubaba njengoba uMandela wayesejele.
“Ubeyinkokheli emzini ayinkokheli nakwezepolitiki. She did not forget that she was a mother. Uye wayithatha leyo responsibility waxhasa ikhaya lakhe wakhulisa abantwana bakhe ebunzimeni. Thina-ke abakwa Madiba Sisonke. We salute her.”
Umuyi uzancwatshwa ngoMgqibelo eJohannesburg kanti isidumbu sakhe sizaphumela enkundleni yeOrlando njalo.