Abakuhlangothi lwabatsha kubandla leZanu PF bathi uzulu kumele anike uMongameli Emmerson Mnangagwa ithuba lokuthi aguqule umnotho welizwe leZimbabwe obhidlikayo.
Bethule lokhu eHarare ngoLwesibili ngesikhathi inhlanganiso ebizwa ngokuthi yiCitizens’ Forum isithi izajezisa inhlanganiso ezizimele zodwa labamele amazwe atshiyeneyo eZimbabwe kulandela ukutshengisela kukazulu emigwaqweni ekhonona ngesimo esibi somnotho.
UNkosazana Cecilia Melody Verenga, unobhala obona ngezokwabiwa kwamasimu kuhlangothi lweYouth League, uthe abasakhulayo akumelanga balalele abakutshelwa ngebezombusazwe ababatshelela eceleni ngokwenzakala eZimbabwe.
Uthe bafisa ukuthi abantu banike uMnangagwa isikhathi sokuthi alungise umnotho osubhidlika hatshi isikhatshana nje.
Kusenjalo, uLonius Rozvi owenhlanganiso yeCitizens’ Forum utshele intathelizindaba ukuba bonke abantu, ohulumende bakwamanye amazwe kanye lenhlanganiso ezizimele zodwa kumele bekele ukulwisana lohulumende kaMnangagwa.
URozvi uthe balobe incwadi ezihanjiswe emawogisini awe Zimbabwe Lawyers for Human Rights, Crisis in Zimbabwe Coalition lezinye inhlanganiso ezizimele zodwa kanye lohulumende wakwele Melika lowe Bhilithani. Uthi kucatshangelwa ukuthi inhlanganiso lezi labameli bazigodlo zamazwe la batshotshozela ukuthi abantu batshengisele emigwaqweni bekhala ngokwenzakala eZimbabwe.
Abalotshelwe incwadi lezi kabakaziphenduli.
