amalinks wokungena

Breaking News

Sinanzeni Sithole: Kangifisi Ukuthi Omunye Umuntu Abelegciwane leCoronavirus Njengami


UNkosazana Sinanzeni Sithole odabuka eZimbabwe ohlala kwele South Africa olomkhuhlane weCOVID-19.

Isizalwane seZimbabwe esathuthela kwele South Africa, uNkosazana Sinanzeni Sithole, osebanjwe umkhuhlane weCOVID-19 ukhuthaza ezinye izizalwane zakibo ukuthi ziqaphele kakhulu ngoba lumkhuhlane udla amahabula.

UNkosazana Sinanzeni Sithole uhlala kwele South Africa.
UNkosazana Sinanzeni Sithole uhlala kwele South Africa.

UNkosazana Sithole, ongumongikazi esibhedlela esizimeleyo eJohannesburg, uthi ukusondela kwegciwane lecoronavirus kuye kuqale ngemva kokuba omkhulu wabo kuleso sibhedlela etholakele elalo. Uthi laboke njengezisebenzi bacabanga ukuthi bayehlolwa kwatholakala ukuthi laye uselalo.

“Nginatha amaphilisi. Nginatha ama-antibiotics. Ngiyaphuza iVitamin C, iVitamin D. Ngiku isolation endlini.”

UNkosazana Sithole uthi kafiseli muntu ukuba longumkhuhlane lo ngitsho lesitha sakhe.

“Abanye bathi icorona ayikho mina ngiphakathi kwayo. Umzimba wami ubabuhlungu. Kwesinye isikhathi ngikhathale le pain ikhanda. Kubuhlungu ngoba ozokuthengela ukudla ukuthengela ukudla akubeke emnyango. Akangeni endlini akubone ukuthi uzwa njani. You are just on your own. Let’s be responsible guys. Ngiyalithanda lonke ngilifisela okuhle.”

UMaSithole uthi ukuyahlolwa nxa ecabangela ukuthi ulaleli gciwane yikho okungasindisa impilo yakho.

UNkosazana Sinanzeni Sithole olesifo seCoronavirus COVID-19.
UNkosazana Sinanzeni Sithole olesifo seCoronavirus COVID-19.

Uthi ukuhlaselwa yilo umkhuhlane kumtshiye lesifundo esikhulu.

“Lami ngingomunye wabantu abebezitshela ukuthi akulacorona. Ngiyabona ukuthi abantu balestigma sokuthi iCOVID-19 ngeyabelungu, hayi ngamanga la.”

Isizalwane seZimbabwe, uMnu. Dumisani Nleya, ofundele ukucubungula ngemikhuhlane esegazini, uthi likhona leligciwane njalo okuzayo kusasekukhulu.

“Igciwane leCOVID-19 liyinto ekhona, eliqiniso ebulala abantu. Kukhona abantu abadlulisa amanga ngokuthi kuligciwane elingekho. Igciwane leli likhona. Kusakukhulu okuzayo. Banengi abasazohamba.”

Sebesedlula izinkulungwane ezilikhulu asebehlaselwe yicoronavirus kweleSouth Africa. Asebebulewe yilo umkhuhlane sebephezu kwezinkulungwane ezimbili.

Facebook Forum

XS
SM
MD
LG