amalinks wokungena

Kubotshwa Abangenisa Abantu eBotswana Okungekho Emthethweni

  • Martin Ngwenya

Zithwele nzima izizalwane zeZimbabwe ezingela maphepha okuhlala kwele Botswana.

AbeZimbabwe abamiswe phambi komthethwandaba kwele Botswana ngoLwesibili bavumile icala abaletheswayo lokungenisa ngundlu abantwana kanye labesifazane elizweni lelo besendleleni yokuyahlangana labazali kanye labomkabo eSouth Africa.

IBotswana ithi amacala la avamile kungeniswa abangalamaphephaa bedlula besiya eSouth Africa.

Umthethwandaba weFrancistown ulalele abathathu beZimbabwe befakaza besehlisa inyembezi besithi badale icala lokungenisa ngundlu abantwana labesifazana eBotswana ngenxa yesimo somnotho esinzima ekhaya.

Omnunzana Sudden Sibanda, Mhlangabezwa Nhliziyo kanye loMthokozisi Ndlovu babotshwe ngemva kokufunyanwa bengenisa abantu abalitshumi lanhlanu edolobheni leFrancistown mhlaka 7 Mpalakazi nyakenye.

Abathathu laba bathi bebethunywa ngabazali babantwana ukuthi babalethe eSouth Africa, kodwa bengelancwadi zokuhambisa, amaphasiphothi.

Umthethwandaba uzwile ukuthi abantwana kanye labesifazane bangeniswa endaweni engavunyelwayo emngceleni weRamokgwebana njengoba babengelamaphasipoti.

Umantshi UDumisani Basupi ukhuze abathathu laba esithi bafaka impilo, ikakhulu zengane, engozini ngokuchapha umngcele endaweni engavunyelwayo.

Omama labo bayavuma ukuthi sesifikile isikhathi sokuthi obaba ikakhulu abasebenza endaweni ezifana leGoli bengafaki impilo zabomkabo kanye lengane engozini...

"Impilo yokulayitshwa ayikho mnandi sihlaliswa kubi kodwa uhlupho yikuswela amaphepha aqondileyo, kodwa yikuthi abantu bayabefuna ukuyafika eGoli, kodwa ayikho mnandi indaba yakhona."

Kukanti omunye laye ulombono wokuthi obaba kumele bethumele omama imali yokuthatha amaphasiphothi kulokufaka impilo engozini ezifana lokudlwengulwa...

"Obaba abathumele omama imali yamaphasiphothi, kuncedani ukufaka ingane kanye labo mama engozini ezifana lokudlwengul?"

Abathathu laba bavumelane lomthethwandaba ukuthi abakwenzayo akulunganga, uSibanda ecela uxolo kanye lesigwebo esincane ngokuthi wadala icala ngenxa yesimo esilukhuni ekhaya. Ethi wayezama ukuhlawula imali yesikolo sabantwabakhe ngokuvuma ukuthwala abantu ebahambisa eSouth Africa.

UNhliziyo yena utshele umthethwandaba ukuthi ukungafundi yikho okumenza athathe umsebenzi wokulayitsha abantu ngundlu.

Kukanti uNdlovu ukhale ngokuthi yena wayezama ukuqoqa imali yokuphathisa unina ongumfelokazi, njalo ephila nzima eZimbabwe

Abogatsha lomthetho eBotswana olwe Directorate of Public Prosecutions bathi abathathu laba abalambali yokudala amacala.

Umthethwandaba uzagweba abathathu laba mhla ziku 24 Zibandlela.

XS
SM
MD
LG