amalinks wokungena

Breaking News

Abadabuka eZimbabwe Abahlala Kwele Botswana Bathi Kayisatholakali Imisebenzi


Abadabuka eZimbabwe abahlala kwele Botswana bathi kawusatholakali umsebenzi kulelolizwe. (Photo: Martin Ngwenya)

Abantu abadabuka eZimbabwe abahlala kwele Botswana bathi kayisatholakali imisebenzi kulelolizwe elikhanya seliqinisa ubudlelwano lohulumende kaMongameli Emmerson Mnangagwa.

Ilanga liphuma lize liyetshona eGaborone abanye abadabuka eZimbabwe belokhu besemigwaqweni lapho abamisa izimota bedinga imisebenzi. Inengi labantu laba basuka eZimbabwe ngenxa yokuswelakala kwemisebenzi. Badinga imisebenzi yezindlini, eyokufuya inkomo lokunye emapulazini loba yini nje engabaphilisa. Bakha phansi isikhathi sonke, okwenza bathukuthele ngokwenzakala eZimbabwe.

UMnu. Enock Bobo, omunye wabadabuka eZimbabwe odinga umsebenzi eGaborone, uthi uthwele nzima kwele Botswana.

“Indubo engibhekana lazo eBotswana yikuthi sisetshenziswa sibhadalwa imali encane njalo sisebenza amahola amade, njalo lokuswela ukuhlaliseka okwenza ukuthi ngihambe ngithwele amehlo ngoba ngingelamaphepha okuhlala elizweni. Ngihlala ngingumuntu oyethukileyo ngoba ngiyakwazi ukuthi noma yisiphi isikhathi ngiyaphelelwa yinjabulo. Siyafisa ukubuyela ekhaya siyesebenzela ilizwe lethu, sihambise iZimbabwe iyephambili.”

Omunye njalo nguMnu. John Shumba otshona emigaqweni edinga umsebenzi onjengokugebha ezivandeni zabantu bakwele Botswana.

“Umsebenzi kawutholakali, lawo ama piece jobs kawasatholakali ngoba abalapha abeBotswana bayawufuna umsebenzi wakhona, sekulokuncintisana. Lomthetho kawuvumi ukuthi sisebenze lapha.”

Amapholisa athwalise nzima abadabuka kwele Zimbabwe abadinga imisebenzi njengabantu laba abahamba izicathulo zize zitsheke bedinga okungabaphilisa.

Abasebenza kwele Botswana abathola imadlana yokuthenga impahla yokuthumezela imuli zabo kwele Zimbabwe labo bakhala ngokuhlawula umthelo we-customs duty ePlumtree, eMphoengs lezinye indawo.

UMnu. Busani Moyo, osebenza emabhasini athwala abantu asuka edolobheni leGaborone esiya eHarare, uthi kumele abantu bavunyelwe ukungena eZimbabwe bengahlawuli umthelo we-Customs duty nxa bethwele impahla enjenge mpuphu lokunye okungatholakaliyo elizweni.

“Ngabe uyanceda ngemphahla eswelakalayo elizweni, ayekele abantu bengene layo bevela emazweni afana leSouth Africa kanye leBotswana. Yikho okunganceda abantu beZimbabwe kakhulu.”

UMnangagwa, owathembisa abantu beZimbabwe izulu lomhlaba esanda kususa owayengumongameli umuyi uRobert Mugabe esikhundleni ngomnyaka ka2017, ubekwele Botswana ngoLwesihlanu lapho alobelane izivumelwano ezimbalwa loMongameli Mokgweetsi Masisi.

UMnangagwa wayecele abadabuka eZimbabwe ukuba babuyele ekhaya esithi uzaguqula indlela okubuswa ngayo elizweni. Kodwa kukhanya engani balutshwana okumangalisayo ababuyela eZimbabwe ngenxa yokuswelakala kwemisebenzi njalo lokwephulwa kwelungelo likazulu ngabezomvikela ababulala abantu abambalwa ngomnyaka ka2017 lanyakenye.

Badinga Imisebenzi Liphuma Lize Liyetshona ...
please wait

No media source currently available

0:00 0:03:22 0:00


Facebook Forum

XS
SM
MD
LG