Ngesikhathi iZimbabwe ibhekane lokuswelakala kwemali emabhanga, abanye sebengena emazweni angomakhelwane anjenge Botswana le South Africa ukuyazama ukuvula amabhuku okugcinisa imali emabhanga emazweni lawo.
Kodwa inengi liphenduka lilokudana libuyele njalo ekhaya lapho okunzima ukuthola khona imali emabhanga ngenxa yokugugudeka komnotho weZimbabwe.
Labo abathunyelwa imali ivela phandle kwelizwe ingena emabhukwini abo okugcinisa imali emabhanga, bathi bathwala nzima ukuthola imali ngesikhathi abasifunayo njalo langohlobo lwama dola eMelikangezikhathi ezinengi bephiwa uhlobo lwama bond notes.
Kodwa imizamo yabo yokuvula amabhuku emabhanga eBotswana itshayana lemiduli ngenxa yokuthi kufunakala amaphepha okuhlala kumbe ukusebenza kweleBotswana.
UMnu. Onesimo Dube ungomunye asebeke bazama ukuvula i-account kwelinye lamabhanga akweleBotswana.
“Siyazaa ukuvula kuBotswana leSouth Africa ukuze ukuthi nxa sithola imali evela phandle kwelizwe siyithole kalula, ngoba ekhaya kunzima ukuyithola. Inkinga yikuthi amanye amabhanga adinga incwadi zokuhlala eBotswana.”
Omunye weZimbabwe, uMnu. Andreas Mpofu uthi kuyazwisiseka ukuthi kungani abanye bakhe bezama ukuzovula amabhuu okugcinisa imali emabhanga akweleBotswana kumbe kweleSouth Africa.
“Bengathini, uma besenelisa bevule mabhuku phandle ukuzebenelise ukuthola imali yabo. Kodwa uhlupho sekunzima sekufunakala amaphepha wokuhlala eBotswana.”
Uthi udubo olukhona yikuthi ukwehluleka ukuvula amabhuku emabhanga phandle kwelizwe kutsho ukuphuma kwemali eZimbabwe okuthiwa yi ‘externalisation’.
“Lokhu kwenza ukuthi kube lokuthiwa yi externalisation. Sekusitsho ukuthi umuntu sekumele athwale imali aphume layo phandle kwelizwe uma efuna ukuyathenga, okuzadala ukuthi imali isilele elizweni.”
Ngomnyaka ka2008, ngesikhathi njalo iZimbabwe ibhekane lokuswelakala kwemali emabhanga, inengi lavula amabhuku okugcinisa imali lamabhanga eBotswana afana labo Barclays.
Kodwa esinye isisebenza seBarclays eGaborone esingafisanga ukuqanjwa ngegama sitshele iStudio 7 ukuthi imithetho yokuvula amabhuku ebhanga sewaqiniswa libhanga elikhulu lelizwe eleBank of Botswana, sekufunakala incwadi zokuhlala lokusebenza eBotswana kulabo abokuza.
