Esinye isiphathamandla sika hulumende wakwele Botswana sikhuthaza ukuthi abadabuka eZimbabwe abasebenza ezindlini kumele baphiwe amaphepha abavumela ukuhlala lokusebenza eBotswana abizwa ngokuthi ngama ‘work and residence permits’.
Umphathintambo obona ngezempilakahle eBotswana, uNkosazana Dorcus Malesu, uthi akulancedo ukuthi abeZimbabwe abasebenza ezindlini bancitshwe amaphepha abanika imvumo yokusebenza lokuhlala kulelo lizwe.
Ekhuluma edale lephalamende, uMalesu usole kakhulu uhulumende wakhe ebuza ukuthi kungani abeZimbabwe bengatholi amaphepha la.
Imsebenzi yezindlini igcinelwe abaBatswana kodwa inengi alifuni ukuthatha leyo misebenzi liyikhangelela phansi.
Kodwa uMalesu, owake waba ngumphathintambo kugatsha lokuthengiselana, olweTrade, uthi kuyaziwa ukuthi leziphathamandla zikahulumende ziqhatshe abeZimbabwe ezindlini kodwa bengala maphepha.
Isizalwane zeBotswana, uNkosazana Pauline Sechele, uthi uvumelana lokukhulunywe nguMalesu ngoba bethwala nzima ukuthola omama abasebenza ezindlini abangaBatswana.
"Linyathelo okwakumele uhulumende alithathe kudala, ayisiyomfihlo ukuthi abeBotswana abafuni ukuthatha imsebenzi yezindlini."
UNkosazana Gladys Ndlovu, osebenza ecatsha engela maphepha, laye uyakwamukela lokhu.
"Akumnandi ukusebenza ucabanga amapholisa, kungaba kuhle ukuthi kuphiwe amaphepha."
Abanye abeBotswana bathi bathanda indlela abeZimbabwe abasebenza ngayo, betshengisa ukuzimisela.
Kodwa noma kunjalo, uhulumende uyala esithi kumele aBatswana bathathe lemsebenzi.
Abasebenza emapulazini bona balenhlanhla ngoba uhulumende weBotswana elokhe esabanikeza amaphepha.
