amalinks wokungena

Mugabe: Ukusilela Kwemali eZimbabwe Kwenziwa Yikupha Amaporofita Imali Enengi


UMongameli Robert Mugabe lomkakhe basemathuneni eNational Heroes Acre eHarare ...

UMongameli Robert Mugabe ngoLwesithathu usole abantu abatululela imali abafundisi abatshumayela ngezokunotha othi yibo njalo abakhala ngokuswelakala kwemali eZimbabwe.

UMugabe wethule lokhu emathuneni elizwe eNational Heroes Acre eHarare ngesikhathi kungcwatshwa umuyi uDon Muvuti, omunye wabalandeli bebandla leZanu PF odumo ngokwethula imibono yakhe kumaphephandaba.

UMugabe uthe labo abathi elizweni akula mali baqamba amanga ngoba nanku phela beyibo abanothisa abafundisi ngeminikelo yabo emikhulu.

Ubulele abantu ngembombo emgcwabeni lo ngokuthi abanye bakhe kuhulumende sebelomkhuba wokugijimela kubafundisi laba besiyathenjiswa izikhundla ezifana lokuba ngumsekeli womkhokheli welizwe kanye lokuvuka bephethe ubukhokheli beZanu PF.

Esipha imibono yakhe ngamazwi kaMugabe, uMnu. Pride Mkono, ingcwethi kwezombusazwe, uthe lobanje abafundisi bamanga bekhona akumelanga adlale ngodaba lokuswelekala kwemali ngoba nguhulumende wakhe owaludalayo.

Omunye njalo ohlaziya ngezombusazwe, uMnu. Peter Mguni, uthe amazwi la ajonge ukuchothoza labo abafisa ukuthatha isikhundla sikaMugabe.

EleZimbabwe selibona ukuqonga kwenani labafundisi abentshumayelo eyamele ezibuzisweni zemali eminyakeni edluleyo osokwenze inengi labo banotha baba yiziphatsha ngemali yeminikelo yabantu abadubekayo bezamela impilo ukuthi mhlawumbe bengakhulkelwa ngabafundisi laba ingaba ngcono.

Lokhu sokwamukelwa ngemibono ehlukeneyo abanye bethukuthele ngokwenza kwabafundisi laba ukuthi baqila inengi labantu abagijimela kibo ngenxa yamasalamusi abawenzayo bedinga inhlalakahle.

Kulabanye abathi bayasizakala ngabafundisi laba loba kusobala ukuba inengi libikwa ligoliswa inhlanzi ngezandla.

Facebook Forum

XS
SM
MD
LG