amalinks wokungena

Wethula Idlalade Elitsha Umculi uZinjaziyamluma

  • Bennedict Nhlapho

Umculi womdumo kaMaskandi uZinjaziyamluma.

Kuhlelo Woza Friday liviki silomculi womdumo kaMaskandi uZinjaziyamluma osehwatshe idlalade elitsha.

Kuleli dlalade elilengoma ezilitshumilantathu, elithi "Intandane", uZinjaziyamluma uthi, uqukethe ingoma ezitshisa okwedlula elanyakenye ebelisithi iCelebrity Lomgunyathi.

Longumculi odumileyo kwezikaMaskandi yinsizwa yaseTsholotsho uZinjaziyamluma.

Uthi, “Lelidlalade okwenze libe namandla ngendlela yokuthi la ama album wonke ecine esekhala ngaphansi kwayo, yizivunguvungu nenkinga engike ngadibana nazo kulo mnyaka lo. Ukujikelwanje ngabantu uthole ukuthi ngabangane bakho, ngokwazana labo bejike lapho bekuhambe ngaphansi bekwenzele phansi ukuthi ucine ubhekiselwa phansi. Kukhulunywe izintonje ezingakuhlambalaza ukwenzela ukuthi uphele amandla.”

Oncedisana loZinjaziyamluma ekuhleleni umsebenzi wakhe, uMlungisi Tshabalala, uthi leli lidlalade okungafuzanga liswelwe loba ngubani othanda umculo kamaskandi.

“Nxa ngiyiqathanisa lomsebenzi wakhe wonke wama album wonke lawa angu 5 asewenzile leli ngilibona mpela esebenze kanzima ekhuluma ngezinto ezenzakalayo empilweni zabantu, izinto ezenzakalayo emphakathini, izinto ezimehleleyo njengomculi, izinto eziphilakuzo thina singabantu.”

Lelike idlalade lizakwethulwa ngokusemthwethweni eHilbrow Theatre ngoMgqibelo emini.

UZinjaziyamluma uthi kuzabe kulabaculi abanengi abamxhasayo kanti wonke umuntu ongenayo uzasuka eseziphathele idlalade leli elitsha kungelambadalo.

Uzinja ziyamluma nxa sekuthiwa ubhekana lestage, uyazi lawe ukuthi kuyatshintshe yonke into. Ngiyenza ngothando lento langokuthi ngiyapractiza minake angifuthi ukuthi umuntu ebhadale imali yakhe bese ngisiyadlala ngamehlo akhe. Abantu bazobonanje into enzima kakhulu laphaya. Ngifisanje wonke umuntu alithole iCD likaZinja leli elithi Igama lentandane. Bangisupporte abantu bangapheli amandla.”

Leli lidlalade likaZinjaziyamluma elesithupha kanti lamadala lawo azabekhona ngesikhathi kusethulwa leli elitsha eHilbrow Theatre.

Facebook Forum

XS
SM
MD
LG