Abasakhulayo beAfrica abagqibe izifundo zabo phansi kohlelo lweMandela Washington Fellowship basuka eMelika ngoLwesine sebephindela emakhaya besithi bakhangelele ukuyaguqula impilo kazulu ngendlela ezehlukeneyo.
Bebengamakhulu amahlanu abasakhulayo abaphatheke kuhlelo lolu bedabuka emazweni eAfrica atshiyeneyo njalo abavela eZimbabwe bebengamatshumi amathathu.
UMongameli Barack Obama usungule loluhlelo kuminyaka esanda kwedlula ngenjongo yokuhlomisa abatsha beAfrica kundaba zobukhokheli, amabhizimusi kanye lentuthuko.
Lanxa abanengi bephindele emakhaya, bakhona abambalwa abaseleyo abazaqhubeka ngezifundo zabo okwenyanga ezimbili.
Ekhuluma ngoLwesithathu emkhosini wokuvalelisa abatsha laba uNkosikazi Michelle Obama uthe uyathokoza kakhulu ngemisebenzi emihle abayenzayo, wabakhuthaza ukuthi baqhubeke ngayo.
UNkosikazi Obama ugxile umbiko wakhe kudaba lokuhlonitshwa kwamalungelo abesifazana lokuqakatheka kwemfundo esithi kuyadanisa ukuthi emhlabeni jikelele kulabantwana abafika izigidi ezingamatshumi ayisithupha lambili, 62 million abehluleka ukuya esikolo.
Uthe abayizigidi ezingamatshumi amathathu , 30 million bavela emazweni ezwekazi leAfrica atshiyeneyo.
UNkosikazi Obama uveze njalo ukuthi inani lamankazana aya emakolishini eMelika ledlula inani labafana, okuyinto athe iveza ukuba umntwana oyinkazana uyaqakathekiswa kuleli.
Omunye wabatsha abaphatheke kuhlelo lolu uNkosazana Zandile Lambu yena osebenzela inkampani yeEconet uthi imfundo iqakathekile.
UNkosikazi Sibusisiwe Ndlovu-Bhebhe uthi umzekeliso kaMIchelle Obama njengomuntu ofundileyo njalo onguFirst Lady weMelika upha abesifazana intshunkutshu yokuphumelela.
Ngomnyaka ozayo uhlelo lweMandela Washington Fellowship luzaqhutshelwa eAfrica lanxa nje kungakazakali ukuthi kuliphi ilizwe.
Kodwa inengi linakanela ukuthi luzakuba seSouth Africa njengoba luphiwe ibizo likaNelson Mandela njengendlelakumhlonipha.