Uhulumende uthi abotshiwe amapholisa ayisikhombisa ajikele intuthu ehitshayo, i-tear gas, ebhasini ebilabantu eHarare izolo.
I-video ebonwe yiStudio 7 iveza abantu beseqa kulibhasi bephuma buthumuthumu ngamafasitela bebalekela intuthu ebisibambile phakathi.
Ugatsha olubona ngokwethulwa kwemibiko lwethule umbiko enkundleni yeTwitter lusithi amapholisa la aphange abotshwa njalo azamiswa emthethwandaba.
Kodwa kalutshongo ukuthi bazakwetheswa cala bani.
Lolugatsha luveze njalo ukuthi iqula laleyobhasi libotshiwe lalo ngoba umtshayeli bekunguwindi.
Isehlakalo lesi sisolwe kakhulu ngabantu abanengi besithi siveza sobala uchuku lwamapholisa.
Ucubungula ezombusazwe uMnu Effie Dlela Ncube utshele iStudio 7 ukuthi amapholisa kumele afundiswe ngendaba zokulondoloza amalungelo oluntu.
