Umeya wedolobho lakoBulawayo uMnu. Martin Moyo, uthi umnyaka lo odluleyo lanxa uze lobuhle obugoqela ukuthakazelelwa kweminyaka elikhulu lamatshumi amabili kanye lokuphatha imidlalo yabasakhulayo ama African Union Sports Council Zone 5 Games,ubulobunzima obulakho ukuqhubeka ngalumnyaka esiwusungulayo oka 2015.
Esethula umbiko wakhe wokwamukela umnyaka ka 2015, umeyawakoBulawayo ukhansila Moyo, uthi idolobho lingena kumnyaka ka 2015 lilokunengi okungahambi kuhle okugoqela ukusilela komhlaba wokuqhelisa idolobho, imali yokuholisa izisebenzi kanye lokuqhatsha ezintsha, ukungabuthwa kwezibi lokusilela kwemali ngenxa yokungabhadali kwezakhamizi.
Uthi lanxa idolobho like laziqhenya ngokugcwalisa iminyaka elikhulu lamatshumi amabili lasungulwa kanye lokuphatha imidlalo yabasakhulayo, umnyaka ka 2015 uqala idolobho lisesimeni esibi. Kwathi kuqala umnyaka ka 2014, uthi izakhamizi bezikweleda ikhansili imali engangezigidi ezingamatshumi ayisikhombisa - $77.2 million kodwa umnyaka uphele ikweledwa izigidi phose ikhulu - $90 million.Esithi idolobho liyazama njalo ukunika abantu umhlabathi wokwakwa izindlu kodwa lokhu kuyehlula ngenxa yokuvalelwa yindawo ye Umguza.
Wengeze esithi ngesikhathi ikhansili yakoBulawayo idweba efisa ukukwenza, iMaster Plan, omanjinela babo babesebenzelana labe Umguza kuboniswana ukuthi umhlaba ungathengiselwa idolobho hatshi abantu nje kodwa lamhla sebebona ngezindlu sezakhiwa nje kuthiwa abantu bathenge umhlabathi kukhansili ye Umguza. Lokhu uthi sokubadidanisa ingqondo ukuthi pho kuthiwa idolobho lakoBulawayo liqhele lisiya ngaphi nanku selivalelwe yi Umguza kumacele wonke.
Umnumzana Elijah Matshe, oyisakhamuzi kulelidolobho, uthi inkinga zonke lezi ikhansili ebhekane lazo zibangelwa yikwehluleka ukuhlela kuhle inhlelo kanye lokusetshenziswa kwemali okungaqondanga ekhansilini. Uthi ikhansili idinga ukukhulumisana lenhlanganiso ezimela izakhamizi ukuze kutholwe ingqubelaphambili ngoba ukumisa ukuqhatshwa kwezisebenzi kulakho ukutshiya uzulu elohlupho ekwelatshweni, ekulungisweni kokuhanjiswa kwamanzi, ukubuthwa kwezibi lokunye okunjalonjalo.
UNkosikazi Busisiwe Jamela, oyisakhamuzi njalo, uthi kuqakathekile ukuthi ikhansili isebenze gadalala kwezebhizimisi ngoba lelidolobho ligcwele abantu abalahlekelwa yimisebenzi okwenza kubenzima ukuthi babhadale inhlawulo yekhansili.
Ngomnyaka ka2014, ikhansili yacitsha imililo phose engamakhulu ayisikhombisa – 685. Ikhansili iqhubeka iphathiswa yinhlanganiso yeBhilithani i-Operation Florian ukuthola impahla yokucitshaimililo.
Unobhala wedolobho lakoBulawayo,uNkosikazi Sikhangele Zhou, uthi ikhansili ibisithwala nzima ukucitsha imililo ngesikhathi osokwenze uzulu walahlekelwa yimpahla ngenxa yokuthi bekungela inkamba ezeneleyo kanye lezimota zokuhambisa. Uqhubeke esithi inhlanganiso ye Operation Florian ibaphathele imitshina kanye lezembatho ezingakabikhona kulelilizwe ezilonhlonzi esezenze ibulawayo yaba lidolobho elithenjiweyo kumpahla elayo yokulwisana lomlilo lezinye ingozi.
Idolobho lakoBulawayo ngomnyaka ka 2015 likhangelele ukunika uzulu izindlu ezingu 562 elokitshini le Emhlangeni le 490 eMagwegwe North. Umeya uthi idolobho njalo likhangelele ukweboleka imali izigidi ezingaphezu kwetshumi - $13.2 million ukulungisa impompi zamanzi lezokuhambisa ingcekeza.