HARARE --Abebandla eliphikisayo eleCitizens Coalition for Change namhlanje bagqibe uhlelo lwabo lokuqoqa uluhlu lwabazamela leli bandla kukhetho olukhulu lwalonyaka ezigabeni ezeHarare. Leli bandla lithi likhangelele ukwethulela uzulu lolu lweHarare kanye lolwezigaba zonke zelizwe, yiloba yisiphi isikhathi.
Baphume ngobunengi abalandeli beCCC ukuzadinga inkokheli abafuna ibamele phansi kohlelo kuqhuba uhlelo lokukhetha abazamela ibandla kukhetho lwalonyaka. Abebandla leCCC baqala loluhlelo enyangeni ezimbili ezedlule njalo olwenzelwe eHarare lungolokucina.
Obekhokhela loluhlelo phansi kwe Ward 9 umnumzana Webster Mawondera uthi impumela yalamuhla eHarare kulabo abanqobileyo kule ward yibo abazomela ibandla esithi khona inkokheli yaphezulu ebandleni izokwaziswa ukuthi ngubani ozomela ibandla njalo ngaphi.
“Kusasa ngeleqiniso lokuthi sizakuba lomhlangano wokubeka ngendlela labo abanqobileyo bezekusaziswa uzulu ngendlela efaneleyo ebandleni. Abayabe bebethiwe amagama abo yibo abazakumela ibandla lethu.”
Impumela kaWard 9 esigabeni seHarare East iveze ukuba umnumzana Tendai Biti uthole amavoti edlula amakhulu amabili lengxenye-254 kuti umnumzana Rusty Markham yena wathola aphezu kwamakhulu amabili-228.
CCC candidate selection
UBiti ngokwakhe ukugcizelele ukuthi inkokheli yaphezulu yiyo ezakwethula amagama alabo abozomela ibandla kukhetho.
“Sesimelele abesigodlo yibo abazasitshela ukuthi ngubani osekhethiwe. Kodwa ngiyalibonga kakhulu.”
U-Markham ubikwa enguye onqobe kuWard 18. Yena uthi akukho akusolayo ngendlela uhlelo luqhutshwe ngayo.
“Ngitsheliwe ukuthi yimi enginqobileyo kuloluhlelo lokudinga abazamela ibandla kukhetho.”
Omunye obencintisa eHarare Central unkosazana Gladys Hlatshwayo utshele iStudio 7 ukuthi uselinde okuzovela kunkokheli yaphezulu.
CCC candidate selection
“Njengokwazi kwenu ukuthi silendlela entsha yokukhetha abameli lapho abalandeli okumele baphatheke khona.”
Omunye wabalandeli beCCC obe khona kuhlelo lwanamhlanje umnumzana Petros Nkomo weZimfos uchasisa ngakubone kusenzakala.
“Ukubona kwami ngibone njengani abanye abantu abavotileyo ayisibo bethu okuzabangela ukuthi ma sesisebenza abantu labo bayabe bengasekho sekusele laba okuthiwa banqotshiwe. But mina ngokubona kwami kade kumele kusetshenziswe i-procedure esavumelana ngayo ukuthi izasetshenziswa. Bekumele kube lamaRegisters but asiwabonanga but abantu abavotileyo abanye bakhona asibazi. So ukuthi sithi bavele ngaphi, we don’t know njengoba iParty isesentsha so asikwazi ukuthi maybe ngabanye bethu because of delimitation.”
Osakhulayo uJonathan Mthimkhulu uthi yena akalansolo ngendlela ukhetho oluqhutshwe ngalo.
“KuMP thina besifuna uMarkham ngakhona simtholile simkhethile sanqoba. Lapha kumaKhansela besifuna uPrince sanqoba lakhona, samkhetha sanqoba.”
Umnumzana Elliot Moyo laye ukhuluma ngokubonileyo ekuqhutshweni kwalolukhetho.
CCC candidate selection
“So sikhethe uKhansela uPrince ngoba ngumfana omncane, ilizwe lethu selisiwa, selinzima. Abantu abadala laba sebehlulekile ukulikhokhelela ngoba ungakhangela khathesi i-size yomfana lo esimkhethileyo ukuthi asimele kuKansila yiyo isayizi yabantwabethu abafayo ngama-drugs emabulujini. Akula msebenzi akula enye i-plan ukuthi bengaphila njani abantwana yikho sikhethe umntwana lo omncane ukuthi amele abanye bakhe abentanga yakhe.”
Unkosazana Melissa Ngwenya laye ukhuluma ngaloluhlelo.
“Ngithakazelela umlungu ngoba sibe sesibone ukuthi esilabo bekufana bekungela tshintsho kodwa khathesi sithi thina iZimbabwe kayintshintshe, ayike intshintshe kesibone ukuthi kuhamba njani lapha elizweni lethu.”
Unkosazana Princess Tshuma waseKambuzuma ukhala ngokuthi kube lokuqilibezela ekuqhubeni kwaloluhlelo kuWard 15 ephansi kweHarare Central.
“Ukubona kwami mina yikuthi ukudinga akade bekwenza abantu, ukubala ekade bekwenza abantu, abanye babaliwe kodwa kulabantu akade behlezi phansi kuthiwa abanye basukumile bayengezelela laba kade belomzila omncane.”
Ingcwethi ecubungula ngezombusazwe enhlanganisweni yeZimbabwe Democracy Institute-ZDI umnumzana Bekezela Gumbo uthi akumangalisi ukuba bekulokuxokozela lokuqilibezelana kuloluhlelo lwabeCCC.
CCC candidate selection
“So leOpposition layo ngabantwana beZanu bonaba abala, iPolitics bazifunde bezibona kuZanu lokhe bephinda into efananayo.”
Njengokutsho kwabekade beqhuba loluhlelo, abazamela ibandla leli kukhetho lwalonyaka khona bezovezwa ngemva kokuba kuhlolisiswe into ezimbalwa yinkokheli yaphezulu yeCCC.
Idale elokubhalisa abazancintisa kukhetho lwalonyaka eleNomination Court, elahlelwa ngabekomishini ebona ngezokhetho eye Zimbabwe Electoral Commission, lizahlala ngoLwesithathu mhlaka 21 Nhlangula, ukhetho lona lusenziwa mhlaka 23 Ncwabakazi.
Ibandla leZanu PF seliqedile ukudinga abazancintisa kukhetho lwalonyaka. Ngakwelinye icele ibandla leMDC elikhokhelwa nguMnumzana Douglas Mwonzora lalo likhangelelwe ukwenza inhlelo zokukhetha abazancintisa kukhetho ekupheleni kwaliviki.
Your browser doesn’t support HTML5
Udaba loluhlu lwabe CCC lwabazamela kukhetho siluphiwa nguMavis Gama