Ngemva kokutshaywa lokulinyazwa kakubi ngamapholisa ngeviki edluleyo u Nkosikazi Sekai Holland lo Nkosazana Grace Kwinje babikwa bevinjwe ngamapholisa kahulumende asebenza nsitha ama CIO ukuthi baphume elizweni.
Imibiko ethulwe ngumka Nkosikazi Holland u Mnumzana Jim Holland ithi ababili laba besebedingelwe indizamtshina yokubasa kwele South Africa ukuthi bayekwelatshwa kodwa ama CIO abalisa bahle babuyiselwa esibhedlela se Avenues lapha abalindwe khona ngamapholisa.
U Mnumzana Holland uthi ama CIO alise ababili laba ukuthi baphume elizweni esithi kufuneka incwadi yokubanika imvumo yokuphuma elizweni evela ku Mphathintambo obona ngezempilakahle. Okwenzakale kunkokheli yamabandla aphikisayo kusolwe kakhulu zinhlanganiso ezizimeleyo elizweni, lomhlaba jikelele, labo hulumende bamazwe abambalwa.
U Nkosikazi Theresa Mugadza ligqwetha elisebenzelana lenhlanganganiso ezilwela amalungelo abesifazane. U Nkosikazi Mugadza uthi okwenzakale ku Nkosikazi Holland lo Nkosazana Kwinje kuzakwenza inhlanganiso zabesifazane zesabe ukukhuluma kumbe ukuphuma zitshengisele ukusola umbuso ka Mongameli Robert Mugabe.