Icele leMDC elikhokhelwa nguMnumzana Morgan Tsvangirai, elisanda kubhidliza uhlangothi lwabesifazane soluphinde lwabhidliza njalo ingatsha zalo kwele Bhilithane le Ireland. Ingcwethi kwezombusazwe zithi zesabela ukuthi ingxabangxoza ekucele leli ilakho ukubhidliza lelibandla, labasekeli balo basale esikhaleni ngesikhathi icele leli kumele lilungiselele ukhetho lomnyaka ozayo. Ekubhidlizweni kwe executive yeBhilithane le Ireland kuhle kwabekwa esikhundleni i Coordinating Committee ezaqhuba inhlelo zebandla okwenyanga eziyisithupha.
Kodwa ngaphandle kokubhidlizwa kwengatsha lezi sokuvele ukudonselana kanzima phakathi kukamongameli walo u Tsvangirai lonobhala jikelele walo uMnumzana Tendai Biti. Kuviki edluleyo uBiti utshele intathelizindaba ukuthi icele lakhe lizaqhubeka likunkulumo zika mongameli Thabo Mbeki laloba amapholisa eqhubeka ehlukuluza amalunga alo. Kodwa uTsvangirai yena uthi lizaphuma kunkulumo lezi nxa amalunga alo ehlukuluzwa.
Umngcinisihlalo webandla leli uMnumzana Lovemore Moyo ekhuluma lo Brenda Moyo we Studio 7 ekweleBhilithane upha izizatho zokubhidlizwa kwalezinhlangothi. Kunjalo nje ingcwethi kwezombusazwe uMnumzana Mqondobanzi Magonya uthi icele elikhokhelwa ngu Tsvangirai likhanya lingalandeli isisekelo sombuso sebandla, okuyikho okwabangela ukudakuza phakathi kwe MDC ngomnyaka ka 2005.