Umanyano wenhlanganiso zabalimi lezisebenzi zabo, iJustice for Agriculture Trust izolo itshele intathelizindaba eJohannesburg ukuthi izisebenzi ezedlula izinkulungwane ezingamatshumi amane sezibalekile emapulazini ngenxa yodlakela olulandele ukhetho lwe nyanga ephelileyo.
Lumanyano olenhlanganiso ezibalisa iJustice for Agriculture le General Agricultural Plantation Workers’ Union of Zimbabwe ithi ezinye izisebenzi zemapulazini azaziwa ukuthi zingaphi. Ingcwethi kwezokulima uMnu. Renson Gasela oyisiphathamandla secele leMDC elikhokhelwa nguMnu. Arthur Mutambara utshele uChris Gande weStudio 7 ukuthi ukuhlukuluzwa kwezisebenzi lokhu kuzengezela indlala evele ikhangelelwe ukubakhon lumnyaka.