Isigodlo someli weMelika eZimbabwe sethule umbiko ngolweSine sisola kakhulu udlakela olumemetheke edolobheni leHarare ensukwini ezedluleyo. Isigodlo lesi sithi udlakela lolu lwephula isivumelwano sikahulumende womanyano eseGlobal Political Agreement.
Isiphathamandla salesisigodlo uNkosikazi Sharon Hudson Dean utshele umsakazo weStudio 7 ukuthi uhulumende weMelika wesabela kakhulu ukuthi lokhu kungahle kwandulele ukuqhela kokwephulwa komthetho lelungelo loluntu
Umbiko lo ulandela udlakela olutshombuluke emizini embalwa yeHarare egoqela i Mbare, Glenorah leBudiriro kwabhidlizwa ezamabhizimisi eGulf Center.
UBrenda Moyo weStudio 7 ukhulume lengcwethi ecubungula ezombusazwe uMnumzana George Mkhwananzi othi uhulumende weZimbabwe kasoze alalele okukhulunywa nguhulumende weMelika ngoba kulenzondano lokungathembani kubo hulumende bobabili laba.
Kusenjalo, icele le MDC elikhokhelwa nguMnu. Morgan Tsvangirai lithi udlakela lokhu luqhubekela phambili elizweni njalo amalunga alo elokhu ehlukuluzwa ezigabeni ezitshiyeneyo zelizwe ngamapholisa labacatshangelwa ukuthi ngabasekeli bebandla le ZANU PF.
UMnu. Thembinkosi Sibindi, isiphathamandla salelibandla esigabeni se Matabeleland North utshele uSithandekile Mhlanga weStudio 7 ukuthi lanxa udlakela lungabhahanga kulindawo, ibandla lakhe liyenqatshelwa ukuqhuba imihlangano ngabasekeli bebandla le ZANU PF.