Amapholisa ngoMvulo ethule amabizo abantu abafele engozini yomgwaqo phakathi kwamabhasi amabili emgwaqweni weHarare-Nyamapanda ngeSonto kwafa abantu abangamatshumi amabili lasithupha.
Abantu laba bagoqela abane abavela emulini inye.
Umphathintambo wezabelo uMnu Ignatius Chombo lomphathintambo obona ngezemigwaqo uMnu Obert Mpofu bethekelele abalimeleyo esibhedlela seParirenyatwa eHarare ngoMvulo.
UChombo uveze ukuthi uhulumende usethethe isinqumo sokuthi ingozi le ibe ngethinte ilizwe lonke jikelele (national disaster), okutsho ukuthi uhulumende uzancedisa imuli zabafileyo labalimeleyo.
Ingozi le yenzakale phakathi kwebhasi yeZupco leyePioneer. Inengi lisola uhulumende lisithi uyehluleka ukulungisisa imigwaqo esimagodigodi ilizwe lonke.
Lanxa kungakaveli sobala ukuthi ingozi le ibangelwe yini, uMpofu uthi uhulumende ulakho ukwehlisa isiqubu izimota ezimele zihambe ngaso njengendlela yokwenqabela ingozi.
Your browser doesn’t support HTML5
Ingxoxo loMnu Obert Mpofu