IJoint Monitoring and Implementation Committee –JOMIC isithembise ukucubungula udaba lodlakela olwenzakale emizini yeMbare leChitungwiza okwamaviki amabili edluleyo.
Inkokheli yesigaba seHarare yamabandla abumba uhulumende womanyano athi, amacele omabili eMDC leZANU PF ivumelene ukuthi kuqakathekile ukuthi udlakela osolukhanya lumemetheka kwezinye izigaba zelizwe lumiswe.
Ekhuluma lentathelizindaba emele amabandla wonke akuhulumende womanyano, umgcinisihlalo weZANU PF uMnumzana Amos Midzi uthe amabandla womathathu asevumelene ukusebenzelana ndawonye ukwenqabela udlakela.
KoBulawayo amabandla ezombusazwe agoqela amacele omabili eMDC, iZAPU leMthwakazi Liberation Front lawo ahlangene avumelana ukusebenzelana ndawonye ekuvimbeni udlakela ngaphambilini kokhetho.
UBrenda Moyo weStudio 7 uxoxe lesikhulumeli sebandla leMDC uMnumzana Nhlanhla Dube osekela ukumanyana kwamabandla wonke akuhulumende womanyano ekulwiseni lokuqeda udlakela elizweni.
Kusenjalo, Iziphathamandla zecele le MDC elikhokhelwa nguMnu. Morgan Tsvangirai eMbare zithi inani lasebehlala emahofisini alelibandla e Harvest House lokhu lisanda. Abasekeli balelibandla babikwa bebalekela udlakela eMbare, olubangelwa ngabacatshangelwa ukuthi ngabasekeli babandla le ZANU PF.
Ukhansila we Mbare uMnu. Paul Gorekore okhululwe ngolweSine ngemva kokuhalwula imali yesibambiso eye bail utshele iStudio 7 ukuthi yena labanye bakhe bahleli emahofisini la, ngoba bebhidlizelwe izindlu, njalo eyakhe yatshiswa.
Kulandela udlakela lolu, inhlanganiso ezimeleyo, ezigoqela eye Heal Zimbabwe zethule umbiko zisola udlakela lokuhlukuluzwa kwabantu eMbare eHarare, e Buhera, eZaka, eMwenezi, eMuzarabani, le Murewa.
USithandekile Mhlanga weStudio 7 uxoxe loMnu. Ivis Ndlovu, isiphathamandla se MDC eMbare, othi ucatshise ikhanda eHarvest House ngoba umumo eMbare lokhu usiba mubi ngamandla.