Umphathintambo wezemali uMnu Patrick Chinamasa usecunule izizalwane zeZimbabwe ezihlala kwamanye amazwe ngokuzicela ukuthi zengeze imali eziyithumezela izihlobo labangane ekhaya.
Uthi iyanceda kakhulu limali njengoba ilizwe libhekane lobunzima kwezemnotho.
UChinamasa wethule amazwi la emkhosini wokuthakazelela ilanga likazibuse oqhutshelwe eWashington DC, kweleMelika ngoMgqibelo.
Ucele njalo abalemali enengi ukuthi baphenduke bayezitshala ekhaya ngokusungula amabhizimusi kungatsha zomnotho ezitshiyeneyo.
Kodwa abanengi bathi kuyadanisa njalo kubuye kuhlekise ukuthi uhulumende engacela ukuthi bathumeze imali yena esala ukuthi bavote bephandle kwelizwe.
UChinamasa ukuvumile ukuthi isisekelo sombuso esitsha sivumela zonke izizalwane zeZimbabwe ukuthi zivote.
Kodwa uthe okuhluphayo yikuthi uhulumende akalayo imali yokubhalisa abantu besemazweni atshiyeneyo lokubavotisa bekulawo mazwe.
Isizalwane seZimbabwe esihlala kweleBhilithani uMnu Difa Dube uthi imali yezizalwane zeZimbabwe ezihlala phandle kwelizwe ayeneli ukuvuselela umnotho welizwe.
