Amakhosikazi ezisebenzi zenkampani kahulumende egebha amalahle, iHwange Colliery atshengisele eHarare ngoLwesine ekhala ngokungahlawulwa kwabayeni bawo yilinkampani.
Abantu abavela kunhlangothi zempilo ezitshiyeneyo ezigoqela iZimbabwe Coalition on Debt & Development, iZimbabwe Rights leZimbabwe Congress of Trade Unions labo basekele amanina la ekutshengiseleni lokhu.
Omunye wabatshengiseleyo nguNkosikazi Talent Sithole yena othe uhulumende kumele ahlawule abayeni babo ukuze benelise ukubhadalela abantwa babo esikolo.
Amakhosikazi la aselenyanga ezedlula esintathu etshengisela khona kanye eHwange. Athi abayeni bawo sebeleminyaka efika emihlanu bengahlawulwa.
Omunye njalo obetshengisela ovele eHwange nguNkosikazi Chipo Tazvivinga yena ochothoze umphathintambo obona ngendaba zezizebenzi, uNkosikazi Petronella Kagonye.
Usole uKagonye esithi waqamba amanga ephalamende esithi wabanika irice le-sepa.
