Umkhokheli weMDC-T uMnu Nelson Chamisa ngeSonto uphatheke emjahweni wokuzizwa amandla ngenjongo yokutshengisela ukuthi uqinile njalo uzimisele ukubusa.
Umjaho lo uqoqwe ngabasakhulayo beMDC-T eHarare phansi kwesihloko esithi #RunforChange okutsho ukuthi Gijimela Inguquko.
Injongo yalumjango emqoka ibingeyokukhuthaza uzulu weZimbabwe ukuthi avotele uMnu Chamisa kukhetho lukaMongameli oluzakwenziwa maduze nje.
UChamisa ubegijiba lomkakhe, umkhokheli wePDP uMnu Tendai Biti labasakhulayo abalwela amalungelo oluntu labebandla lakhe.
“Ngiyababonga bonke abaphatheke kulujaho namuhla. Siqinile njalo sizimisele ukungena embusweni,” kutsho uChamisa ngemva kokugijima amakhilomitha amahlanu.
Osakhulayo weMDC-T uMnu Mlandu Ncube utshele iStudio 7 ukuthi umlayezo ekade bezama ukuwuthumeza ngomjaho lo ngowokuthi sesifikile isikhathi sokuthi uChamisa angene embusweni.
