Amabandla ezombusazwe athi aselungiselela ukuyabhalisa abantu abazancintisa bewamele eNomination Court mhlaka 14 ngoNhlangula kulandela ukwaziswa kwelanga lokhetho nguMongameli Mnangagwa.
Nanku okufunwa ngumthethwandaba lo; ukuze umuntu evunyelwe ukuncintisa kukhetho lukaMongameli kumele abe leminyaka yokuzalwa engamatshumi amane kumbe ephezulu njalo kumele abhadale amadola ayinkulungwane eyodwa, i$1000.
Kumele akhethwe njalo ngamalunga ebandla lakhe aphezu kwalitshumi esabelweni sinye ngasinye.
Abancintisa kukhetho lwamalunga edale lephalamende kumele babe leminyaka engamatshumi amabili lanye kumbe ephezulu.
Kumele babhadale njalo amadola angamatshumi amahlani, $50 eNomination Court.
Iminyaka yabafuna ukuba ngamakhansila iyafana leyamalunga edale lephalamende; umahluko yikuthi akulamali ebhadalwayo.
Isiphathamandla secele lePDP ekhokhelwa nguNkosikazi Lucia Matibenga uMnu Sengezo Tshabangu utshele iStudio 7 ukuthi ngempela sebelumelele usuku lweNomination Court.
Amazwi kaTshabangu agcizelelwe nguMnu Khaliphani Phugeni, umsekeli wesikhulumeli secele leMDC-T elikhokhelwa nguNkosazana Thokozani Khupe.