amalinks wokungena

Breaking News

Ziyakhokhela Izimbamgodi Kungalane yePSL


Sezingutshiki lobhanqa phezu kwengalane yemiklomelo izimbamgodi ngemva kokuba iqembu leNgezi Platinum Stars linqotshwe okwakuqala selokhu kuqale imidlalo yalonyaka yeCastle Premier Soccer League.

Iqembu leli leleFC Platinum alemiklomelo engamatshumi amathathu lathobaminwembili ngalinye ngemva kwemidlalo elitshumi lanhlanu.

Amaqembu la asenqobe kumidlalo elitshumi lambili aba ngutshiki lobhanqa kumidlalo emibili njalo anqotshwa kumdlalo owodwa.

Kodwa iqembu leNgezi lihlezi phezulu ngoba lona lihlohle kanengi ukwedlula eleFC Platinum.

please wait

No media source currently available

0:00 0:03:03 0:00

Okunye okufanayo yikuba lawamaqembu kumdlalo owodwa anqotshwe kuwo atshaywe liqembu leBulawayo Chiefs lona elitshaye eleNgezi nge1 ka0 ngeSonto. NgoMabasa linqobe eleFC Platinum nge2 ka nya.

Umqeqetshi weNgezi uTonderai Ndiraya, ekhuluma ngemva komdlalo wabo, ukhale ngendlela unompembe uHardly Ndazi abambe ngawo lumdlalo.

“Kunengi okwenzakeleyo emdlalweni okungangithokozisanga,” kutsho uHardly Ndazi.

“Yebo siyavuma ukuba unompembe laye ngumuntu olakho ukwenza amaphutha kodwa nxa engenza amaphutha amathathu alakho ukuguqula isimo somdlalo kusuka kube lobunzima.”

UNdiraya ukhale ngokuthi iqembu lakhe lincitshwe umbekwa kodwa iqembu leChiefs lawuphiwa kwathi phezu kwalokho iqembu leNgezi liqede umdlalo selisilela ngabadlali ababili abatshengiswe ikhasi elibomvu ngehlandla lesibili lomdlalo.

Kusenjalo iqembu leHighlanders liyale lilokhu lisendaweni yesithathu engalaneni ngemva kokutshaya eleHarare City ngoMgqibelo lakhuphula inani lalo lemiklomelo laya kumatshumi amabili lathobamunwemunye.

Iqembu leTriangle yilo eselihlezi endaweni yesine ngemva kokutshaya eleDynamos nge3 ka nya njalo lilemiklomelo engamatshumi amabili lesithupha.

Ngaphansi kwengalane iqembu elijeke amanye eleMutare City selilingana ngemiklomelo leqembu elihlezi endaweni yesibili nxa usuka phansi eleBulawayo City.

Amaqembu womabili la alemiklomelo elitshumi lanye ngalinye ngemva kokuba eleMutare litshaye eleCAPS United nge2 ka 1 kwathi eleBulawayo City lehluleke ukuvikela amagoli amathathu umdlalo waphela selingutshiki lobhanqa 3 ka 3 leqembu leYadah.

Amanye amaqembu asendaweni ezine ezisemsileni wengalane ngabalisa eleShabanie Mine elilemiklomelo elitshumi lambili njalo elibhaxabulwe nge4 ka nya ngele FC Platinum lele Chapungu elilemiklomelo elitshumi lantathu njalo elinqotshwe ngeleZPC Kariba nge 3 ka 2.

Kusenjalo iqembu elimela ilizwe emdlalweni wenguqu lona eliselizweni leSouth Africa ukuyaphatheka kumncintiswano weCOSAFA lidlulele kusigaba sama semi-final ngemva kokunqoba eleBotswana nge 4 ka 1 ngemva kokutshaywa kwembekwa emdlalweni wequarter-final odlalwe ngeSonto.

NgoLwesithathu iqembu leZimbabwe lizadibana leqembu leLesotho lona elinqobe eleSwaziland nge 1 ka.

Komunye umdlalo we semi-final iqembu leZambia lizadlala leleMadagascar.

Facebook Forum

XS
SM
MD
LG