Amabandla aphikisayo asesole kakhulu uMongameli Emmerson Mnangagwa ngokukhuthaza izinduna ukuthi zivotele ibandla lakhe leZanu PF.
UMnangagwa wethule amazwi la emhlanganweni awenze ngoMgqibelo.
Kodwa isisekelo sombuso welizwe sicacile ekuthini kulicala ukuthi inkokheli yosiko, egoqela osobhuku, izinduna kanye labalisa, ingenele kundaba zombusazwe.
Umthethwandaba weHigh Court lawo wethule isinqumo esigcizelela lokhu kumaviki edluleyo phezu kwecala ebelisetheswa umholi wezinduna uMnu Fortune Charumbira.
Umkhokheli webandla leFederal Democrats of Zimbabwe uMnu Zenzo Nyoni uthi uMnangagwa wephule umthetho ngenkuthazo yakhe njalo kumele abanjwe ngecala.
Kodwa uthi akumangalisi lokhu ngoba kungumkhuba weZanu PF ukusebenzisa izinduna njengodlawu ngesikhathi sokhetho.
